Qezaya Şaxî ya Wanî de 11ê êlule de sivîlî Servet Turgut û Osman Şîban ameybî destbendkerden û dima înan rê îşkence ame kerdene, helkopterî ra erzîyayî. Wekîlê xoserî Ahmet Şikî derheqê serebûtî de raporêk amade kerd. Şikî Meclîs de kombîyayîşê çapemenîye kerd û rapor eşkera kerd.

Rapor de ame parekerdene ke Şikî 23ê teşrîna verêne ya 2020î de Wan de şahîdan û mexdûran reyde pêvînayîşî kerdî. Şikî waşt selahîyatdaranê dewlete yê ser Walîyê Wanî, fermandarê leşkeran, Serdogerîya Komare ya Wanî de zî pêvînayîşan bikero û înan red kerd. Reyna bi bahaneya 'biasayîş nîyo' ame astengkerdene ke Şik cayê serebûtî deweka Surikî de cigêrayîşan bikero.

Roja serebûtî hîrê gerîlayî û hîrê leşkerî şer de merdî. Leşkeran dima cigêrayîşê herême de Servet Turgut, Osman Şîban nê şerî ra dima ameyî destbendkerdene. Roja serebûtî domanî zî tede dewe de 13 kesî estbî.

Fekê şahîdan ra îşkence

Rapor de ca dîya îfadeyê şahîdan. Şahîdan ard ziwan ke 11ê êlula 2020î de saete 05:00 de vengê teqayîşî ame û dima xeylêk helîkopterî niştî war. Heman roje nêmroje helîkopterêk nişt war û 20 leşkerê çekdar û kamuflekerdeyî ameyî hetê dewijan û leşkeran dewijî dewe de kom kerdî, kontrolê nasnameyî kerd û dewijan rê vat: ''Terorîstî yenê tîya? Şima hetkarîya terorîstan kenê? Yuzbaşiyê ma merd. Ma do dejê ey şima ra vejê. Dewijan leşkeran rê vat ke ê kar û gureyê xo de yê la reyna zî leşkerî înan rê bi xirabî têgêrayî. Goreyê şahîdan (dewijan) leşkerî bi gefan dewe ra şîyî ver bi waran. Dewijî agêrayî karê xo. Servet Turgut zî seba ke karê xo bikero deijan ra kewt dûrî û şi axpînê xo. Cemê şanî saete 16.00-17.00 de leşkerî reyna ameyî dewe.

Osman Şîbanî Ahmet Şikî rê qala îşkenceyî wina kerde: ''Ez verê berî de bîya. Mi dî ke leşkerî hê Servet Turgut anê. Di perranê ey de leşkerî estbî, leşkero bin zî peyî ra çeka xo dabi paştîya ci. Sey çuwal pê çîyêk sereyê ey girewte bi. Ê ver bi mi ameyêne. Ez tersaya. Leşkerî qîrayêne, vatêne 'Osman Şîban kam o?' Mi va ez a. Înan venga mi da. Ameyî hetê mi. Înan sereyê Servetî ra çuwal vet û hîrê reyan ci rê persa ke Osman Şîban ez a yan nê. Dima leşkeran nasnameyê mi girewt, persa ke ez Turgut şinasnena yan nê. Mi va ez şinasnena. 4-5 leşkeran ez tepişta û ma berdî cayê vaşî.''

Goreyê raporî leşkeran ware de koçeran ra persenê ê senî ameyî uca. Koçeran zî vat ke Osman Şîban ware da înan. Dima leşkerî seba ke Osman Şîban bigêrê di perran ra herême ra vila benê. O çax zî Servet Turgut vînenê û anê dewe.

Tay dewijî zî leşkeran teqîb kenê û vînenê ke ê hê Osman Şîban û Servet Turgut nişnenê helîkopter.

Birayê Osman Şîbanî Cengîz Şibano ke bi şahîdê serebûtî vat:''Leşkeran pê paskilan birayê mi û Turgut berdî. Leşkerî serê girêkî de vindert, pê adirî xebere daye û helîkopter ame. Leşkeran dormeyê Osman û Turgutî girewtbî. 15-20 leşkerî estbî. Tay leşkerî helîkopterî ra ameyî war û Servet û Turgut eştî zereyê helîkopterî. Helîkopter şi. 14ê êlule de birayanê mi telefon de mi rê vat Osman û Turgut nêweşxane de servîsê ciewnîyayîşê giranî de yê. Ma sey keye şîyî Wan nêweşxane. La leşker û polîsî uca de bîyî nêverdayêne ma înan bivînê. ''

Osman Şîbanî dima ke ê ameyî destbendkerdene se bî nê nêbî rapor de wina behsê ci kerd: ''Helîkopter de 20 leşkerî estbî. Ez ewnîyayêne rîyê înan rê. Yew da rîyê mi ro û vat ewnîyayîş, qiseykerdiş qedexe yo. Înan dayêne mi û Servetî rê. Helîkopter de di cenazayê endamanê rêxistine estbî. Cenazayî zereyê torba de bîyî. Leşkerêkî rîyê cenazayêke mojna mi û vat ez ey şinasnena. Mi vat ez nêşinasnena. Înan reyna da mi ro. Adaptorî ra vengêke vatene wa ê ma berê cayê leşkeran. Zereyê helîkopterî de înan zaf da ma ro. Yew leşker yan zî fermandar seba Servetî vat 'Zaf piro medê, no kokim do bimiro.' ''

Dewamê raporî de ame vatene ke dima ê helîkopterî ra erzîyayî war û qasê 100-150 leşkeran alizîyayî înan ser. Goreyê raporo ke Osman Şîbanî tede îfade kerd, wexto ê ginayî erdî ro û leşkerî alizîyayî înan ser, înan rê reyna îşkence ame kerdene.