Dewleta tirke ya îşxalkere 15ê hezîrane de pê droneyanê çekdaran hêrişê Meclîsê Şarî yê Sinûrê yê Şingalî kerdbi. Hêriş de tutêk amebi qetilkerdene û xeylêk kesî birîndar bibî. Nê birîndaran ra Îbrahîm Derwêş Evdîyî vizêr dinyaya xo bedilnaye.

Cenazaya Evdîyî  nêweşxaneyê Mûsûlî ra ameye girewtene û vizêr saetanê şanî de ameye berdene Şingal. Cenazaya Evdîyî keyeyê ci ra bi konvoyêkî ameye berdene Goristanê Şêbl Qasimî ke koyanê Şingalî de yo. Tîya bi tewrbîyayîşê bi hezaran kesan cenaza ameye definkerdene.

Meclîsê Xoserîye yê Şingalî keyeyê Îbrahîm Derwêş Evdîyî rê serweşîye waşte û vat heta ronayîşê Şingalê xoser û azadî ê do rayîrê şehîdan de têkoşîn bikerê.