Roniştoxê Şingalî vera peymana PDK-Iraqî ya serê Şingalî pîya wayîrê Asayîşê Êzidxanî û hêzanê xo yê pawitişî vejîyenê ke peymane 9ê teşrîna verêne ya 2020î de ameye îlankerdene.

Şingalijî 45 rojan ra nata verê Asayîşê Êzidxanî de xeyme de bi şîarê 'Ma pêro asayîş ê' çalakîya nobete kenê.

Qeza û bajarekanê Şingalî ra her roje xeylêk kesî û temsîlkarê meclîs û dezgehê Şingalî xeyma çalakîye zîyaret kenê û tewrê çalakîye benê. Şarê Şingalî wazeno ke Asayîşê Êzidxanî û xoserîya Şingalî bi hawayêkê fermî bişinasîyê.

Şarê Şingalî heta nika xeylêk caran waştişê xo pêşkêşê hukmatê Iraqî kerdî la selahîyetdaranê Iraqî hema zî cewabê waştişan nêda.

Endama Meclîsê Pêroyî yê Şingalî Semîre Seîd îfade kerd ke wextê fermanî de înan hêzê xo viraşt û ê do heta peynî hetê hêzê xo yê pawitişî de bibê. Semîre ard ziwan ke ê edalet wazenê û venga êzidîyanê kampanê Başûrê Kurdîstanî da ke agêrê Şingalî û vera plananê serê Şingalî wurzê payan ser.