Dima ke Şingal destê DAÎŞî ra ame xelisnayene êzidîyan Şingal de Îdareyo Xoser îlan kerdbi. La hema zî na xoserîye binê gefan de ya. Hêrişê dewleta tirke û hukmatê Iraqî yê vera Şingalî dewam kenê. 

Seba ke şaristanê Mûsilî bibo wayîrê îdareyêkê herêmî projeyêk pêşkêşê Parlamentoyê Iraqî ame kerdene. Goreyê nê projeyî şaristanê Mûsilî do biboo paytextê herême û qezayê ke Şingal zî tede yo do bibê bajarekê xoserî.

Mesuldarê projeyan ê Îdareyî yê Mûsilî Faris Cuweycatîyî amadekarê nê projeyî yo. Ey derheqê projeyî de ANFyî rê qisey kerd.

Faris Cuweycatîyî bale ante armancê projeyî ser û vat: ''Seba xizmetkerdişê menfaat û serdestîya Iraqî, seba bihêzkerdişê Mûsilî û çareserîya meseleya êzidîyan mi no proje pêşkêş kerd. Proje goreyê qanûnê 13. hetê Parlamentoyê Iraqî ra 2008 de ame tesdîqkerdene. Ma seba caardişê projeyî xîretanê xo rê dewam kenê. Çarçewa sîyasetê dinya yê Meclîsê Îdareyî yê Mûsilî de ma pê bawer ê ke heqê domananê Şingalî pabesteyê herêma Mûsilî yo. Seba çareserîya meseleya Şingalî awankerdişê nê projeyî zaf girîng o.''

Mesuldarê projeyan ê Îdareyî yê Mûsilî Faris Cuweycatîyî vist vîrî ke goreyê Qanûnê Bingeyî heqê êzidîyan est o ke xoser bibê û vat: ''Madeya 125. ya Qanûnê Bingeyî yê Iraqî destûr dana ke Şingal de xoserîye bêra awankerdene. Şingalî her kesî ra zêdêr zaneno ke çareserîye seba înan çi ya. Xoserîye heqê êzidîyan o. Xoserîya Şingalî do karê dewleta Iraqî rê bêra.''