Şirnex: Bi hezaran kesî vera faşîzmî Newroze de ameyî têhet

Şirnex de bi hezaran kesî waranê Newroze de ameyî têhet û înan vera faşîzmê AKP-MHPyî û tecrîdê Îmraliyî mesajê xoverdayîşî dayî.

Şirnex de Newroze bi şîarê 'Wext wextê serkewtişî yo' bi beşdarîya bi hezaran kesan û binê vewre de bi coşî ameye fîrazkerdene. Warê Newroze de pankartê sey 'Newroze serewedaritişê azadîye yê cinîyan o' ameyî daliqnayene.

Cinîyî, doman û ciwanî pê kincanê herêmîyan tewrê şayîye bîyî. Merdimî kontrolê GBTyî ra dima gêrîyayî warê Newroze. Newroze pê merşê Çerxa Şoreşê û pê deqayêkê rêzgirewtişî dest pêkerd. Sere de Rêxistina HDPyî û MEBYA-DER xeylêk temsîlkarê dezgeh û sazgehan tewrê Newroze bîyî.

Wekîla HDPyî ya Şirnexî Nurane Îmîr şayîye de vat: ''No war vera tecrîd, dewaya qefilnayîşê partîya ma û ê kesanê ke îradeyê kurdan nêşinasnenê cewab o. Ê se kenê wa bikerê do pê kurdan nêeşkê. Ya azadîye ya azadîye.''

Vervatoxa Meclîsê Cinîyan ê HDPyî Ayşe Acar Başaran vat: ''Şirnex de bi desan reyî operasyonê qirkerdişê sîyasîyî ameyî kerdene la rixmê ney zî şarê Şirnexî apey gamêke nêeşte. Birêz Ocalanî rayîrê çareserîya meseleya kurdan mojnabi. La îtîfaqê şerî no red kerd. Ma reyna veng danê ke tecrîd wedarnê. Heta ke tecrîdê vera Birêz ocalanî biqedîyo û meseleya kurdan çareser biba têkoşîn û xoverdayîşê ma do dewam bikerê.''

Qiseykerdişan ra dima Başarane, Îmîre û Mayanê Haştîye pîya adirê Newroze vist ta. Rixmê vewre zî girseyî pê deyîranê Koma Hîvronî govende girewte.