Serkêşîya DBPyî de Şirnex de derheqê yewîya neteweyîye de eşkerayîyêke ameye dayene. Xeylêk partîye sîyasîyî û rêxistinê komelê sîvîlî tewrê ci bîyî.

Eşkerayîye hetê Hemsereka KCDyî Leyla Guvene û Hemserekê DBPyî Keskîn Bayindirî ra ameye kerdene.

Guvene vat: ''Êyê ke dereheqê kurdan de qeraran genê ganî reyna bifikîrîyê. Ma tîya ra bi nameyê dayîkanê kurdan veng danê. Şerê mabênê kurdan xizmetê kurdan nêkeno. Ganî her kes nayî hol bizano ke şerê mabênê kurdan do qet kes/e qebul nêkero. Êyê ke pê nê kayan kurdan xapînenê qirkerdişê kurdan wazenê. Xora heta nika seba ke ma yew nêbîyê ma hende dejî antî. Yewbîyayîş şert o. Poltîkayê leyminî ma ser o yenê caardene. Nika zindanan de semedê wedartişê tecrîdê serê Abdullah Ocalanî grevê vêşanîye esto.  Ma verê nê polîtîkayan bibê yew û îtîfaqê xo ronê.''

Bayindirî  vat: ''Îqtîdar wazeno ke destkewtayanê kurdan çîn bikero. La wa nê xo vîrî ra mekerê ke kurdî sey verî nîyê. Kurdan zanayîşê neteweyî fînayo dest û statuyê xo qezenc kerdo. Şarê kurdî muzakere û dîyalog wazeno. Waştişê ma hemeyan no yo. Îqtîdar şer wazeno ganî şarê kurdî vera nayî bibo yew û mucadeleyê xo pîlêr bikero. Ganî helêke cuwa ver yewîya neteweyîye ya kurdan bêro caardene.''

Çalakîye de bi sloganan xoverdayîşê Rayberê Şarê Kurdî Abdullah Ocalanî û tepişteyanê sîyasîyan ame selamkerdene, waştişê yewîya kurdan ame ziwan û xayînîye ameye şermezarkerdene.