Hukmatê AKP-MHPyî waranê keskan û parkanê ke şarê Wanî tede nefes gêno bi destê Serekatîya Îdareyê Bînayan ê Pêroyînan ê Serewezaretîye (TOKÎ) roşeno.

Merkezê Wanî de baxçeyê nêweşxaneyê dewlete yê verênî yê taxa Tepebaşi û Parka Bandura Mîllî sey waro peyên ê keskî yê şaristanî yenê şinasnayenê. TOKÎ waştbi serra 2018î de nê warî biroşa labelê seba ke komelî nêrazîbîyayîşê xo mojnabi nêeşkabi biroşa. Nê her di cayî zî 12ê kanûne de seba rotişî newe ra ameyî pêşkêşkerdene.

Şaredarê Wanî yê AKPyî Buthan Yenîgunî mabênê serranê 2004 û 2009î de 5 serran de se ra 90 warê keskî yê Wanî rotî. Weçînayîşê herêmî yê 2009î de Partîya Komelê Demokratîkî (DTP) ser kewte. Dewirê DTPyî de zaf warê keskî ameyî viraştene. Dima ke qeyûmî Şaredarîya Wanî rê û Rêya Armûşî rê ameyî tayînkerdene, warê keskî newe ra pêşkêşê terefgîranê AKPyî ameyî kerdene.

Vera naye şarê Wanî nêrazîbîyayîşê xo mojna. Roniştoxê herême vanê ''AKP mabênê 15 serranê peyênan de şaristan kerd beton. Kuçeyan û rayîran de darî estbî. Nika mumkîn nîyo ke ti darêke bivîne. Ney ra têna no yeno famkerdene; ê têna fikirîyenê ke ma senî şar ra bidiznê û senî bieşkê nefesê şarî çin bikê. Nika zî bi rayîrê qeyûmî hema çîyî kenê."