Serê weçînitişî ra hewteyêk ra vêşêr ravêrt, la hewna zî mazbatayê hemşaredarîyanê HDP’yî yê Şaredarîya Bajarê Pîlî ya Wanî û qezayanê ci nêameyî dayene. Na yewe zî sey teşebusêkê seba nimitişê karanê nelegalan û amadekarîya hîleyêka newî yena diyene.

HDP’yî bi nisbetê 54’î, bi 261 hezarî rayan Şaredarîya Bajarê Pîlî ya Wanî fînaye dest. AKP’yî zî se ra 40 yanî 196 hezarî rayî girewtî. Rixmo ke HDP’yî 65 hezarî rayî AKP’yî ra vêşêr vetî, hewna zî mazbatayê hemşaredaran nêameyê dayene.

Qezaya Erdîşî de zî HDP’yî 35 hezarî û 600 rayî, AKP’yî zî 33 hezarî rayî girewtî. Rixmo ke mabênê înan de 3 hezarî rayî estê zî rîyê îtîrazê AKP’yî yê YSK’yî ra rayî newe ra yenê hûmaritene. Serê weçînitişî ra hewteyêk ra vêşêr ravêrto, la hûmaritişê rayan ê Erdîşî hewna zî dewam keno.

Şaredarîyêka bîne ya ke HDP tede bi ser kewt qezaya Rêya Armûşî ya. HDP’yî 20 hezarî rayî AKP’yî ra vêşêr girewtî, la hewna zî mazbatayê hemşaredaranê HDP’yî nêameyê dayene. AKP’yî seba newe ra hûmaritişê rayanê qezaya Rêya Armûşî muracatê YSK’yî kerd.

HDP’yî Şaredarîya Colemêrgî de zî 10 hezarî rayî AKP’yî ra vêşêr girewtî. La belê seba newe ra hûmaritişê 1 hezar û 200 rayan ê nêravêrteyan AKP’yî muracatê YSK’yî kerd. Muracatê AKP’yî yê Colemêrgî ame qebûlkerdene û eke heme rayê nêravêrteyî serê AKP’yî de bêrê hûmaritene zî do netîce nêvurîyo.

Hard Dîskî Cayê Înan Ra Vetî

Derheqê sebebê nêdayîşê mazbatayanê hemşaredaranê Bajarê Pîlî yê Wanî de di îhtîmalî vejênê vernî. Bi dergkerdişê wextî wazenê ke karanê nelegelan ke hetê înan ra ameyê kerdene binimnê, belgeyan raste ra wedarê, yan zî dest bi amadekarîya hîleyêka newî ya seba desteserkerdişî bikerê. Xebatkarêkê şaredarîye yo ke rîyê sebebanê ewlekarîye ra nêeşka nameyê xo eşkera bikero vat ke heme hard dîskê komputeran cayê xo ra ameyê vetene. Ê ard ziwan ke no çî tena bajarê pîlî de nê, heman wextî de qezaya Rêya Armûşî de zî ameyo kerdene.

7 Rojî Yo 342 Sindoqî Yenê Hûmaritene

Qezaya Erdîşî de ke HDP ûca bi ser kewt, AKP’yî seba ke rayî newe ra bêrê hûmaritene muracatê YSK’yî kerd û muracatê înan ame qebûlkerdene. YSK’yî tavilî bi waştişê AKP’yî newe ra dest bi hûmaritişê rayan kerd. Hûmaritişê 342 sindoqan 7 rojî yo ke dewam keno, la hewna nêqedîyayo. Goreyê hayîdarîyan keyeyê şaredarîye zafane ameyê rotene, wesayîtê şaredarîye sazîyanê bînan ê dewlete rê ameyê xelatkerdene. Mîyanê hewteyêk de malê şaredarîye yê ke vaya înan kerdêne mîlyonêk ameyê rotene.

Colemêrg De Zî Heman Hîlekarî Esta

Hem Wan de hem zî Colemêrg de nê kayê AKP’yî benê sebebê razînêbîyayîşê şarî. Hemwelatijêk Colemêrg ra qisey kerd û vat AKP seba ke karanê xo yê nelegelan ê ke nê di serran de kerdê binimno wina têgêreno.