Hemserekê Partîya Herêman ê Demokratîkan (DBP) yê Amedî Mehmet Bakirî tecrîdê vera Rayberê Şarê Kurdî Abdullah Ocalanî û cezaya qedexeyê pêvînayîşan ANFyî rê ercnayî.

Bakirî ard ziwan ke 22 serrî yo ke vera Rayberê Şarê Kurdî tecrîdêko giran yeno kerdene û vat:''Tecrîdî reyde nika zî ci rê cezaya qedexeyê pêvînayîşê avûkatan dîyaye. AKP şexsê Birêz Ocalanî de şaranê Tirkîya ceza keno. Wexto ke Birêz Ocalanî reyde pêvînayîşî yenê kerdene komel beno aram.AKP-MHP polîtîkaya tecrîdî hînî vurnayo tewirêkê îdareyî. La tecrîd şer û şer zî tecrîd keno weye. Coka seba silametîya komelî ganî vera tecrîdî têkoşîn bêro kerdene.

Tirkîya de bêhuqûqî hêverî Îmrali de qewimîya dima êro welatî ra ame vilakerdene. Nika pêro Tirkîya seke Îmrali ya. Ziwanê nîjadperestî yê AKP-MHPyî ra vera kurdan hêrişî yenê kerdene. Netîceya polîtîkaya AKP-MHPyî de şarî vera yewbînan yenê xirabkerdene.''

Bakirî pare kerd ke polîtîkayanê hukmatî ra Tirkîya mîyanê welatanê dinya de ameye tecrîdkerdene û vat: ''Îqtîdarê AKP-MHPyî her ca de hêrişê kurdan û muxalîfan keno. Bi nê hawayî wazeno payan ser o bimano. AKP-MHP Tirkîya bi rejîmê 'yewperestîye' îdare kenê.''

Bakirî da zanayene ke qedexeyê pêvînayîşê avûkatan ê seba Ocalanî yeno a manaya ke hêrişî do bizêdîyê û wina dewam kerd: ''Tepiştiş, destbendkerdiş resayî astêka berze. No qedexeyê pêvînayîşan zî dewamê komployî yo û paradîgmaya Ocalanî hedef keno. Ê kesê ke xo rê vanê demokrat û haştîye pawenê ganî vera tecrîd û bêhuqûqîye Îmrali de têkoşîn bikerê.''