12 hezar multecîyê kurdê ke Kampa Şehîd Rûstem Cûdîyî (Mexmûr) ya şaristanê Mûsilî de manenê ambargoyê giranî yê hukmatê Iraqî de têrî manenê. Hemserekîya Meclîsê Şarî yê Mexmûrî bi eşkerayîyêke pare kerd ke hukmatê Iraqî kartanê nasnameyan nêdano şarî, xizmetê weşîye nêdano û dekewtişê xida asteng keno.

Eşkerayîye de bale ameye antene pêvînayîşanê peyênan ê mabênê Iraq û Tirkîya ser û ame vatene ke nê pêvînayîşan ra dima tedayê vera kampe zêdîyayê. 

Meclîsî vat: ‘’Kampe rixmo ke hetê îdare û asayîşî ra pabesteyê hukmatê Iraqî ya, babetanê weşîye, perwerde, binawanîye, îdare û huqûqî de çareserîye nêna kerdene. Di serran ra nata nasnameyî nêdîyenê şarî, dergûşî nufusî rê nênê qeydkerdene û nêweşê sey kanserî xizmetanê weşîye ra bêpar yenê verdayene.

Hetkarîya werdî ya ke pêro multecîyanê Iraqî rê dîyena, nêna dayene kampa Mexmûrî. Ancî projeyê awe û rayîrî yê kampe bi serran o nêno kerdene.

Hewteyêkî ra nata zî hukmatê Iraqî nêverdeno ke malzemeyê îhtîyacî yê esasî debikewê kampe.’’

Vera Kampa Mexmûrî 2019î ra nata ambargoyê PDKyî dewam keno. Kampe tim bena hedefa hêrişanê dewleta tirke zî.