Endamê Meclîsê Partîya Cuya Azade ya Kurdîstanî (PJAK) Amed Şaho tewrê bernameyê Aryen TVyî bi û xoverdayîşê 'Jin, Jiyan, Azadî' yê Rojhelatê Kurdîstanî û Îranî ercna.

Amed Şahoyî bale ante girîngîya şorişê şaranê Îran û Rojhelatê Kurdîstanî ser û vat: ''Şarê kurdî tim vera cehaletî têkoşîn kerd û erjê Îslamî pawitî. Ewro zî şarê kurdî vera serdestîya ke yena ferzkerdene, têkoşîn keno. Têkoşînê 'Jin, Jiyan, Azadî' şar hişmend û zanaye kerd. Xora şîarê 'Jin, Jiyan, Azadî' vano ke biwanê, bimusê. Naye ra rejîmê Îranî keno ke tedeyîya nê şîarî pûç bikero. Rejîm ê kesanê ke nê şîarî anê ziwan sey 'muharb' yanî 'dişmenê Homayî' pênase keno, cezaya îdamî dano ci. No kerdiş bi xo xerapkerdişê Îslamî yo.''

Amed Şahoyî qala ci kerde ke mamostayê dînî serkêşîya çalakîyan kenê û vat: ''Yewîya mamostayan nê şorişî de zaf girîng a. Vera îqtîdarî bihêzbîyayîşê mamostayan, destekê komelî û waştişê şarî girîng ê. Ganî no tewir bêro xurtkerdene. Ganî pêro warî bibê warê îdeolojî, serê bingeyê şorişê eqlî de ser şoriş bêro averberdene. Kurdîstan de camîyî zaf ê la rejîmê Îranî camîyî kerdê cayê bênasnamekerdişî û kiştişî. Ganî komel nê camîyan destê rejîmî ra bigêro û bikero merkezê têkoşînî, dîyalog, çareserî û îdareyê komelî. Nê merkezan de roşnvîr, avûkatî, cinîyî, ciwanî û pêro beşê bînî eşkenê vera Îslamê sîyasî, hişmendîya faşîste ya îqtîdarî têkoşîn bikerê.''