Amed de walîtîye heqê mînîbusanê zereyê şaristanî  se ra 25 zêdîna. Walîtîye verî zî heqê mînîbusan zêdînabi. Bi nê hawayî heqê mînîbusan 2 TL ra zêdîya bi 2,50 TL. Par heqê mînîbusan 1,50 bi.

Ne Merkezê Koordînasyonê Reseyî yê Şaredarîya Amedî (UKOME) ne zî walîtîye derheqê vaykerdişî de verî eşkerayîyêke nêdaye. Hemwelatîyî serê sibayî wexto ke şîyêne kar û gureyê xo pê vaye hesîyayî.

Odaya Ramitoxan a Amedî  Sidki Egeyî serê sibayî Walî û Qeyûmê Şaredarîya Amedî Munîr Karalogluyî rê sipas kerd.

Hemwelatîyanê Amedî vera vaykerdişî nêrazîbîyayîşê xo medyaya komelkîye de mojna. Hemwelatîyan vat: ''Emser meaşê ma se ra 25 nêzêdîya. Şima senî eşkenê hende heqê mînîbusan  bizêdînê? Ma naye qet qebul nêkenê.''