Amed: Ganî ziwanê sazîyanê kurdan bibo kurdkî

Amed û xeylêk bajaranê bînan ê Kurdîstan û  Tirkîya de derheqê Roja Ziwanê Dayîke de kombîyayîşê çapemenîye ameyî viraştene û ame vengdayene ke wa kurdkî rê wayîr bêro vejîyayene.

Bi wesîleya 21ê Sibate Roja Ziwanê Dayîke ya Dinya  xeylêk bajaranê Kurdîstan û Tirkîya de kombîyayîşê çapemenîye ameyî organîzekerdene. Kombîyayîşan de bale ameye antene serê ziwanê dayîke û ame vengdayene ke wa kurdkî rê wayîr bêro vejîyayene.

Amed de bi tewrbîyayîşê temsîlkaranê 9 partîyanê kurdan  eşkerayîyêke ameye dayene. Eşkerayîya ke Sûr de ameye dayene vervatoxê Platformê Ziwanê Kurdî Şerfhan Cizîrî ard ziwan ke eke kurdî wayîrê ziwanê xo mevejîyê benê qetilkarê şarêkê qedîmî yê Rojhelatê Mîyanênî û  vat: ''Netewî bi ziwanî nasname fînenê dest, eke kurdî ziwanê xo vînî bikerê şarêko qedîm do bibo vîn. Coka ganî roşnvîrê kurdan berpirsîyarîya xo bîyarê ca û kurdkî qisey bikerê û kurdkî binusê.''

Badê eşkerayîye hemsereka KCDyî Leyla Guvene persê kedkeranê çapenî ser  o vist vîrî ke xebatê pawitiş û averdişî yê kurdkî yê têgêrayîşê sîyasîyî yê kurdan qîm nêkenê  û vat ganî ziwanê sazîyanê kurdan bibo  kurdkî . Guvene bale ante ke  temsîlkarê partîyanê ke tewrê kombîyayîşî bîyî pêro camêrdî, vera naye hêrsê xo ard ziwan û vat dadîyan ziwan heta ewro kirişto la cinî tîya çîn ê. Guvene vat ganî vera polîtîkaya asîmîlasyonî her warê cuya de semedê averberdişê kurdkî xebatî bêrê girdkerdene.

Reyna rayberîya HDP û ÎHDyî de Êlih, Mêrdîn, Şirnex, Wan, Muş,Meletî, Dîlok, Semsûr, Agirî, Îdir, Erzirom, Adana, Îstanbul Îzmîr, Mersin, Aydin, Hatay û xeylêk bajaranê bînan ê Kurdîstan û Tirkîya bi wesîleya 12ê Sibate eşkerayîye ameye dayene, polîtîkaya asîmîlsyonî ameye şermezarkerdene û semedê wayîrveyayîşê kurdkî ame vengdayene.

 

.