Fermandaranê Qerargehê Merkezê Pawitişê Şarî (MPŞ) ra Amed Malazgîrtî bernameyê taybetî yê Stêrk TVyî de qisey kerd û şerê Herêmanê Pawitişî yê Medya ercna.

Malazgîrtî vat: ''Dewleta tirke zaf hole zana ke PKK hêzê xo Rayberîye ra girewto û coka tim hedefo verên Rayberîya ma yo. Pê tecrîdê giranî wazena Rayberîya ma şarî ra raqilno û têgêrayîşê ma bêperspektîfî biverdo. Xora dişmen tim wazeno têgêrayîşê ma tesfîye bikero û werte ra wedaro.  Bi seran o vera têgêrayîşê ma na çarçewe de hêrişî yenê  kerdene. Dewleta tirke 6 serrî yo hewa û erdî ra şewe û roje hêrişê Herêmanê Pawitişî yê Medya kena. 2022 de hêrişê îşxalî tewr giranî ameyî kerdene. Dewleta tirke vatêne qey demê kilmî de Avaşîn, Zap û Metîna de netîce gena û hêrişê vera destkewteyanê kurdan dana destpêkerdene. Badê Zapî hedefê înan Rojawanê Kurdîstanî bi la ma Zap de no planê dewleta tirke betal kerd.

Dewleta tirke semedê hêrişî parî xeylêk wext xo amade kerdbi la tedbîrê gerîlayan hesab nêkerdbî. Dewleta tirke ya ke nêeşkena vera têkoşînê gerîlayana aver şiro, verê çimanê dinya de çekanê kîmyewîyan şuxulnena. Dewleta tirke do rojêke miheqeq hesabê nê sûcan bido. Zap de 9 aşmî yo gerîlayî vera dewleta tirke ya ke xo sey artêşa girde ya diyîne ya NATOyî hesibena, xover danê. Şerê Zapî hema bi pêro şîdetê xo dewam keno. Dewleta tirke badê çalakîyanê bitesîran ê Gerîlayanê Azadîye yê Kurdîstanî xeylêk waran ra xo peyser ante la tay nuqtayan de hêzê arêtşa îşxalkere est ê. Mesela Mam Reşê Şeladize de hema hêzê ci est ê.''

Amed Malazgîrtî derheqê rewşa peyên a şerî de nê vatî:  ''Nika hema hêrişî dewam kenê. Ê îdîa kenê ke netîce girewto la no raşt nîyo. Hema hêrişê dişmenî û pêkewtişî qewimîyenê. Na rewşe mojanena ke ê Zap de ser nêkewtî. Tay nuqtayan de hêzê dişmenî û embazî têmîyan de yê. Bitaybetî Çemço û  Sîda de pêkewtişê giranî ciwîyenê. Mesele Çemço de dişmen 9 aşmî pê heme îmkananê xo hêrişê tumê Çemê Reşî keno la hema no tum nêgirewto. Hêzê ma heme heme Çemço de her roje çalakîyan kenê. Hêzê dişmenî na hele de vera tumê Şehîd Adîlî yê Sîda çekanê kîmyewîyan ê qedexeyan şuxulnenê.

Selahîyetdaranê dewleta tirke eşkera kerd ke înan operasyonî qedînayî la no raşt nîyo. Serra newî de zî hêrişê îşxalî yê dewleta tirke dewam kenê. Ganî kurdî û dostê înan bizanê ke şer do emser bibo giranêr. Ganî ciwanê kurdan her ca de çîyo ke destê înan ra yeno bikerê. Her ciwanê kurdan semedê şerî wayîrê tecrubeyî yo, êyêke îşxal, zext û zulm kenê zelal ê. Ganî hedefê xo bewlî bikerê û hêriş bikerê. Ganî ciwanî bitaybetî tewrê hemleyanê 'Bazanê Zagrosî' û 'Cengê Xabûrî yê Şehîd Savaşî' bibê. Ganî ciwanê kurdan her ca de xo rêxitin bikerê çalakîyanê bitesîran bikerê.''