Komeleya Heqanê Merdiman (ÎHD) ya Amedî, Baroyê Amedî, Temsîlkarîya Weqfê Heqanê Merdiman ê Tirkîya (TÎHV) ya Amedî, Odayê Tebîban ê Amedî vera qirkerdişê sîyasîyî eşkerayîya hempare daye.

Eşkerayîye de nê ameyî vatene: ''64 kesê ke derheqê înan de qerarê tepiştî esto ra 44 kesî ameyî destbendkerdene  mîyanê înan de extîyar û nêweşî zî estê. Rîyê nê caardişanê antîdemokratîkan ra komel nêeşkeno nefes bîgêro. Heqê bingeyênî yê şarî yenê binpaykerdene. Bi qeyûm û hêrişan îradeyê şarî yeno xespkerdene. Muameleyo xirab hem nezaret de hem zî kuçeyan de bîyo sey çîyêkê normalî. Xebatê rêxistinanê sivîlan ê komelî her tim yênê sînorkerdene.  Vera cinî û qican hêriş û sucî her roje zêdîyêr benê. Bi destbenkerdişê Makbule Ozbek zextê vera haştîye  û tehîqatanê vera Komeleya Cinîyan a Rosa zextê vera dezgehanê cinîyan zafêr benê. Ma sey pawitoxanê heqanê merdiman naye qebul nêkenê. Ganî nê caardişê teberê huqûqî cade bêrê qedînayene.''