Tepişteyanê PKK û PAJKî 27ê teşrîna peyêne de zîndananê Tirkîya û Vakurê Kurdîstanî de vera tecrîdkerdişê Rayberê Şarê Kurdî Abdullah Ocalanî û binpaykerdişê heqanê tepişteyan grevê vêşanîye dabi destpêkerdene.

Komîteya Zîndanan a PAJKî ra Gulê Amed grevê vêşanîye yê tepişteyan ANFyî rê ercna.

Qiseykerdişê Gulê Amed ra beşêk wina yo:

''Vengê grevê vêşanîye yê tepişteyan vengê têkoşînê seba azadîya Rayber Apoyî yo. Ganî her kes veng bido nê vengî. Embazanê ma çarçewa Hemleya 'Wextê azadîye yo' de dest pê grevê vêşanîye kerd. Ma pê bawer ê ke çalakîya embazanê ma do ser bikewa. Rayberê ma zîndanê Îmraliyî de vera rejîmê faşîstî yê dewleta tirke xoverdayîşêko bêhempa keno. Rayberê ma 22 serrî yo tecrîdkerde yo. Hînî milîtanê PKK û PAJKî tecrîd û esaretê Rayberê ma rê tehamul nêkenê.

Grevê vêşanîye yo nikayên dewamê grevê vêşanîye yê 2018 yo. No xoverdayîş zî azadîya Rayberîye keno armanc. 2018 de rayberîya embazanê ma de netîceya xoverdayîşê 200 rojan de tecrîd amebi şiknayene. Hemleya ma 'Wextê azadîye yo' pê mekan û zemanî sînordar nîya. Hemleya ma heta ke Rayberê ma azad bibo û faşîzm çin bibo do dewam bikero.

Xoverdayîşê embazanê ma û ê keyeyanê înan AKP tersneno. Dewlete vera nê keyeyan operasyonan kena û dadîyanê 70-80 serreyan destbend kena. Çunke keyeyî wayîrê xoverdayîşê zîndanan vejîyenê. Ganî her kes dormeyê xoverdayîşê tepişteyan de bêro pêser, xoverdayîş geş bikero î her ca bikero meydanê xoverdayîşî.

Embazê ma yê cinîyî rayberîya xoverdayîşê zîndanan kenê. Xoverdayîşê Zîndanê Amedî rayberîya embaze Sara de,  xoverdayîşê 2018î zî rayberîya Leyla Guven de ameyî kerdene. Xora embaze Leyla Guven zere de zî teber de zî têkoşînî ra fek vera nêda. Coka dewleta tirke ya faşîste nika tira qesasê xo gêna.

Ez venga her kesî dana ke dormeyê tepişteyan de bêro pêser, wayîrê têkoşînî vejîyo û xoverdayîş geş bikero.''