Endama KJKyî Aytene Amed derheqê serebûtanê Tirkîya û Rojhelatê Mîyanênî de rojdem ercna.  Amede serrgêra 41. a ronayîşê PKKyî fîraz kerd û vat PKK bi xoverdayîşê xo hînî resa astêka mîyanneteweyî.

Ercnayîşê Aytene Amed wina yê:

"Ez sere de roşanê ganîbîyayîşî yê Rayberîya xo fîraz kena. Çunke musna ma ke ma senî bi têkoşînê demokratîkî wayîrê heqanê xo vejîyenî. Nika wexto ke vanê PKK çita yeno vîrê merdimî? Tarîxê merdimîye yo ke ameyo vurnayene ewro newe ra naye se ro yeno vindertene. Wexto ke no çi bêro kerdene xoverdayîş ra ber rayîrêk nêmaneno. Seba ke merdim nê çi abiko ganî biewno tarîxê ronayîşê PKKyî. Wexto ke hema komêke bîye qedroyê 6 tenan ra ber destê înan de firsendêk çinbi. Destê înan de bawerîye ra ber û fikrê dîyarkerdişê çarenusê neteweyê xo ra ber rayîrêko îdeolojîk yan zî teorîk çinbi. Rewşêka winasêne ra bi sayê xoverdayîşê rayberîye têna kurdî ney pêro şarê bindestî wurznayî payan ser. PKKyî bi sayê xoverdayîşê xo û paradîgmaya xo warê pratîkî de no çi ard ca. Roja awanbîyayîşê xo ra heta nika senî ke xeta xoverdayîşî awan kerde naye ra pey zî do wayîrê tewirêkê eqlaxî û polîtîkî bibo. Têkoşînê PKKyî têna pûçkerdişê înkarî û îmha nîyo. Têkoşînê PKKyî seba pûçkerdişê polîtîkayanê înkaran û îmhayanê netewe dewletan o. Xoverdayîşê vera dewlete ganî têna bi warêk sînordar nêbo. Têkoşîn her cayê komelî de dewam biko. Rayberîya ma pawitişanê xo de vat dewlet+demokrasî."

Cayo ke Tede Xoverdayîş Esto Teslîmîyet Çin o

"9ê teşrîna verêne de hêrişê îşxalkeran dest pêkerd. 9ê teşrîna verêne serrgêra komployê mîyanneteweî ya vera Rayberîya ma ya. No hêriş tesaduf nîyo. Mesajêkê vera PKK, kurdan o. La ganî bêro zanayene ke kurdan 9ê teşrîna verêne ra dima xurt bîyî û destkewteyê xo kerdî zêdêr. Mîsalê ney zî Rojawan û Vakurê Sûrîye yê. Vera îşxalê Rojawanî xoverdayîşê bi mengan dewam keno. No xoverdayîşêko asan nîyo. Tarîx de şarê ma bi bedelanê pîlan wayîrê estbîyayîşê xo vejîya. Cayo ke tede xoverdayîş esto teslîmîyet çin o. Eke teslîmîyet bibo xoînkarderiş zî beno. AKP her roje vano PKK çin bîyo. La eqsê ci PKK hetê îdeolojîk, paradîgmasal û rêxistinbîyaye ra dewrê xo yê tewr bihêzî de yo. PKK nika bi têgêrayîşêko mîyanneteweyî. Pêro şarê dinya PKK şinasneno û dewaya kurdan hîna zêde verê çiman de ya."