Endamê Rayberdişî yê KCK’yî Xebat Andok tewrê programêkê taybetî yê Stêrk TV’yî bi û cewab da persanê Gulan Avrêle.

Endamê Rayberdişî yê KCK’yî Xebat Andokî destpêkê qiseykerdişê xo de şehîdê menga Gulane bi vîr ardî û çalakwanê grevê vêşanîye silam kerdî. Andokî vat, “Bi wesîleya prosesê ‘Tecrîdî bişikne, faşîzmî birijne û Kurdistanî azad bikere’ nika 15 embazî kewtê rojeyê mergî. Heman wextî de ma çalakwananê ke bi serkêşîya Leyla Guvene çalakîya grevê vêşanîye domnenê, xoverdayîşê înan bi hurmet silam kenê.”

Andokî bale ante serê tarîxê xoverdayîşê şaran û wina vat, “Xoverdayîşê 68’î waşt ke temamê cimatî rê seypêyîye û edaletî bîyaro. Labelê umîdanê dimatî rê nêeşka bibo cewab. Bi serkêşîya Denîz Gezmîş, Huseyîn Înan, Îbrahîm Kaypakkaya, Yûsûf Aslan, Mahîr Çayan û Rayber Apoyî ke sey embazêkê înan pîya kewtîbî rayîr, bê ke cîyakarî bifînê mabênê şaran, seba pêroyê şaran dest da yewbînan û mucadele kerd.

Andokî dewamê qiseykerdişî xo de nê vatî:

“Faşîzmê dewleta Tirkî teberê xo de çewî nas nêkeno. Înan çepgêrîya Mûstafa Sûphîyî qebûl nêkerde û o kişt. Dînan ra zî tena bawerîya Îslamê Sunîyî qebûl kenê, înan Ermenî, Laz, Çerkez û Elewîyî yanî hema hema vajê heme rengê Rojakewtena Mîyanêne qir kerdî. Ganî ma Kurdî biewnîrê halê xo ra û ci ra şerm bikerê. Çunke çîyo ke merdimî fîneno mîyanê têgêrayîşî şerm o. Çîyo ke bi sebeb ke Rayberîya ma têgêrayîşêkê winayênî awan bikero şerm bi. Ganî şarê ma naye ra tarîxê xo rê wayîr vejîyo û hemverê hêrişan de bêveng memano.

Dewleta Tirkî çi rey nêbîya dewleta Tirkan. Ma zî sey şaro Kurd çi rey hemverê dewleta Tirkan de şer nêkerdo. Se ra 95 sîlehê Tirkîya yê ke yenê şuxulnayene yê Amerîka û NATO yê. Heta problemê Kurdan ê Tirkîya hal nêbo do çi rey demokrasî nêro Tirkîya. Çunke çimeyê antîdemokratîkbîyayîşê Tirkîya problemê Kurdan o. Faşîzmê Tirkî nika bi tîfaqê Erdogan û Bahçelîyî heme formanê faşîzmî serê Kurdan de bica ano. Naye ra kes eşkeno vajo ke faşîzmo ke nika esto heme wextan ra bihêzêr o. Sebebê nê zî no yo ke şaro Kurd, Kurdistan û Tirkîyayêka demokratîke wazeno, no zî do peynîya îqtîdarê înan.

Faşîzmî giranîya xo daya serê tecrîdî, na hemleya ke ameya destpêkerdene zî seba qedînayîşê tecrîdî ya. Şaro Kurd saya Rayber Apoyî de resa na derece û ci rê wayîr vejêno. Merdim eşkeno xeylî mînakanê sey embaze Leyla Guvene û bi hezaran hemrayanê aye bido. Nika zî 15 embazî kewtê rojeyê mergî, na zî çalakîyêka şorişgêr a. Leyla Guvene xo resnayo dereceya azadîye, çunke aye tecrîdê serê Rayberê şaran qebûl nêkerd. Wextêkê winayênî de lazim o ke merdim hîs û wijdanê xo verê çiman ra ravêrno. Yê ke nika nê kenê mayê ma yê. Cinîyan tarîx de Şehîd zîlane ra heta Leyla Guvene bi hawayê tewr xasekî rolê xo kay kerdo, na yewe ra ma vanê cinî estûna cimatbîyayîşî ya.”