Artêşa tirke vêşnena, ekolojîstî şinê Dêrsimî

Artêşa tirke sey xeylêk waranê bînan ê Kurdîstanî Amed û Dêrsim de zî waranê daristanî de şewat vejena. Ekolojîstî Îstanbulî ra do şirê Dêrsimî.

Herêma nabênê dewanê Gazik û Arcumakî ya qezaya Pulurî ya Dêrsimî de netîceya bombardumanê artêşa tirke ya îşxalkere de daristan de şewat vejîya. Seba ke semedê hewnakerdişî şewatî rê mudaxale nîno kerdene şewat vila beno.

Wekîlê HDPyî yê Dêrsimî Alîcan Onlu û hemserekê HDPyî yê Bajarî Nurşate Yeşîl û Îbrahîm Kasun waşt saetanê serê sibayî de şirê dewa Xezku ke tede şewat vejîya la leşkeran destûrê înan nêda.

Alîcan Onluyî tîya hersê xo ard ziwan û vat: '' Na cografya de şewat bi xo nêvejîyeno. Xozaya ma yena vêşnayene. Ewro heme rayîrî girewtî ke ma meşirê warê şewatî. Sey tim ma ewro zî nêvanê şima qey şewatî hewna nêkenê, ma vanê şima qey şewatî vejenê.''

Reyna  dewa Derkamî ya qezaya Licê ya Amedî de zî warê daristanî yê ke qereqolê leşkeran tede yo de şewat vejîya. Şewato ke netîceya teqnayîşê fîşekanê leşkeran de vejîya ci rê mudaxale nêame kerdene. Seba ke şewato ke vila beno cayê dewe rê nêzdî yo şar qerqilîyeno.

Hetê bînî ra 34 rêxistinanê ekolojîstan û pawitoxanê cuya Îstanbul bi eşkerayîyêke da zanayene ke ê do şirdê Kurdîstan. Ekolojîstî semedê cigêrayîşê rijnayîşî û paştdayîşê pawitoxanê cuya do şirê Dêrsimî.