Îqtîdarî 'reformê hukmkerdişî yo newe' ard rojdem. Avûkatê Baroyê Wanî û Endamê Komeleya Huqûqnasan ê Azadan (OHD) Cahît Ertanî babete ANFyî rê ercnaye.

Ertanî îfade kerd ke sîstemê hukmkerdişî rijîya û ganî çareserîya naye bêra dîyene û vat: ''Ma sey huqûqnasan wazenê ker her çi ra verî wa dadger û dozgerî sey huqûqnasan têbigêrê, bibê objektîf û goreyê delîlan biran bigêrê. Eke rêxistinê komelê sivîlî û dînamîkê komelî tewrê amadekarîya reformî nêbê o çax reform do serkewte nêbo.''

Ertanî da zanayene ke seba caardişê reformî ganî awanîya Heyetê Dozger û Dadgeran (HSK) bivurîya û binê kontrolê îqtîdarî ra bêra xelisnayene. Ertanî vat: ''Ganî HSK wayîrê budçe û heqanê xo bibo. Ganî hukmkerdişî bi hawayêkê xoserî û goreyê normanê dinya bêrê kerdene. Ganî hukmkerdiş bi temamî xoser bibo. Eşkera yo ke îqtîdarî hukmkerdiş kerd çeka xo. Ma biranê vera HDPyî naye vînenê. Hukmkerdişo xoser eke hukmkerdiş destê îqtîdarî ra bixeliso mumkîn o. Nêbo reform zî bêro kerdene çîyêk nêvurîyeno. Tirkîya peymanê mîyanneteweyîyî binpay kerdî. Coka hende meseleyî estê. Eke Tirkîya reform nêkera la qanûnanê nikayênan zî bîyara ca xeylêk meseleyî do çareser bibê.''