Endama Konseya Hemserekîya Pêroyî ya KCKyî Sozdar Avesta bernameyêkê taybetî yê Stêrk TVyî de peymana PDK û hukmatê Iraqî ya seba Şingalî û hesabê gemarinî yê Şingalî ser o ANFyî rê ercnayî.

''Tarîxê na peymane 9ê teşrîna verên o. Têna no zî îbat keno ke armancê na peymane tasfîyeyê Rayber Apo û Têgêrayîşê Azadîye yê Kurdîstanî yo. Na peymana ke hetê DYA ra amade bîye, planê gemarinî nîşan kerdî. Tay kurdanê bêbextan zî hetkarîya DYA kerde. AKP û Tirkîya zî cara teslîmê hêzan ê komplogeran bîyî.  Peymana seba Şingalî parçeyêkê komployî yo.Fermanê na peymane bi xo hetê Baxçelî û Erdoganî ra dîya û na peymane vera ê hêzanê ke DAÎŞ bin kerd ameye kerdene. Qirkerdişo ke DAÎŞî nêmcet verda bi na peymane yena caardene.

Seke şarê Şingalî ard ziwan na peymane meşrû nîya û do qet nêra caardene. Çunke na peymane dewamê fermanî ya.  Bi mengan o Şingalî ser o planê gemarinî yenê kerdene. Şingal dîya bombayan ver, ciwanê êzidîyî ameyî qetilkerdene la êzidîyan nê kayî pûç kerdî.

Seba ke na peymane de îrade û tesdîqê êzidîyan çin o meşrûtîyetê ci zî çin o. Hêzê mîyanneteweyîyî xoserîya Şingalî qet qebul nêkenê. Eke Şingal bi nê hawayî bêro îşxalkerdene Rojawan de zî îşxalî do dewam bikerê.

DAÎŞî serra 2014î de îşxalê Şingalî ra verî bi rayîrê PDKyî sînoê Rojawan û Başûrî de xendekî kinitbi. Reyna serra 2017î de cerganê PDKyî hêrişê Şingalî kerdbi. Nê çîyî hema zî dewam kenê.

Eke hêzê Şingalî meşrû nîyê hêzê Hewlêr û Silêmanî zî meşrû nîyê. Ê hêzî domanê Şingalî yê. Vanê PKK înan rê ardim kerdo. Raşt o PKKyî Şingal xelisna, rêxistin kerd û perwerde da şingalijan. Êyê ke nê çîyî nêkerdî wa hesab bidê ma nê. Êyê ke Şingal tik û teyna verda û remayî, meşrû nîyê. Ganî nê hêzî bêrê hukmkerdene û hesab bidê. Ma sey PKKyî bi rûmetêkê pîlî Şingal pawit.

YBŞ, YJŞ û Asayîşê Êzidxanî bi bedel û kedan şarê xo pawit. Wa çew înan ser o hesaban nêkero. Qeymeqamê Şingalî Meclîsê Xoserîya Îdareyî yo. 6 serran ra nata Meclîs ûca îdare keno û qet yew mesele nêqewimîyaye. Nê Meclîsê Xoserîya Demokratîke de têna êzidîyî nê erebî zî estê. Înanê ke ewro YBŞ, YJŞ qebul nêkenê, ê rojan de ci rê sipas kerdêne. 

Pêro dinya zanena ke PKKyî Şingalî ra xo apey ant. Vanê şingalijî terefgîrê PKKyî yê, meşrû nîyê. Şarê Şingalî de cade eşkera kerd ke ê do na peymane qebul nêkerê. Ez înan fîraz kena. 

Heta nika partîyanê Başûrî vera na peymane tewirê xo nêmojna. Ez pê bawer a ke şarê ma yê Başûrî zî do na peymane qebul nêkero. Bi taybetî partîyê sîyasî yê Başûr û Iraqî vera na peymane ganî nêrazîbîyayîşê xo bimojnê.