Endama Konseya Serekîya Pêroyî ya KCKyî Sozdar Avesta bernameyê 'Rojeva Welat' ê Stêrk TVyî de cewab da persanê rojnamegere Mehtape Orak. Avesta sere de Komployê 15ê Sibate zaf babetî ercnayî. Ercnayîşê Avesta ra beşêk wina yo:

''Ez serrgêra 21. ya Komployê Mîyanneteweyî de pêro şehîdanê ma yad kena. 22 serr ê ke Rayber Apo bi hawayêkê fîzîkî sey esîr yeno tepiştene. Ez Rayber Apoyî rê bi heskerdiş, hûrmet û mînetdarî selam kena.

Şêx Seîd zî menga sibate de bi komployêk ame tepiştene û 29ê hezîran de Şêx Seîd û embazê ci ameyî dardekerdene. Komployê Mîyanneteweyî yê vera Rayber Apoyî zî heman menge de sibate de dest pêkerd.Armanc û hedefê komployî înkarê kurdan bîyî. Rayber Apo zî na roje 15ê Sibate sey 'Roja qirkerdişê kurdan' pênase kerde.

Hêzanê herême estbîyayîşê Rayber Apoyî fikr û felsefeya ci seba xo sey asteng dîyêne. Çunke nê hêzî menfaatanê xo ser o vindertêne. Rojhelatê Mîyanênî de hetê Rayber Apoyî ra paradîgmayêka newîye ameye pêşkêşkerdene. Rayber Apoyî yewîya şaran awan kerde. Seba dewleta tirke meseleya kurdan sey 'fobî' ya. Dewleta tirke nêwazena kurdî bibê wayîrê statuyî, nasnameyêkî. Hêzanê mîyanneteweyan zî nê komployî de cagirewt ke DYA, Îsraîl û Îngîlîztan serekîya înan kerdêne.

Dewleta tirke ya faşîste senî ke ê rayberê ma yê bînî darde kerdî waştêne ke Rayber apo zî darde bikera û mîyanê 6 mengan de têgêrayîşê azadîye tasfîye bikera. La Rayber Apoyî no kayê înan dî. Rayber Apo bi tewirê xo, xoverdayîşê xo averşîyayîşê komplo vindarna. Zaf fedakarîyê pîlî kerdî. Têgêrayîşê azadîye zî heman wextî de xoverdayîşêko pîl kerd. Têgêrayîşê azadîye Rayber Apo teqîb kerd, bi fikr û ruhê Rayber Apoyî têkoşîn kerd. Hînî rastîya Rayber Apoyî pêro dinya de vila bîye.

Seba ke Tirkîya xo rê girê bidê, înan PKK vist nîyanê lîsteya terorî. Kamî AKP ard hukm ser? Esas AKP projeyêkê komployî yo. Hêzê ke serekîya komplo kerdêne kredî da AKP. Înan AKP awan kerd. AKP projeyê dewamkerdişê komployî yo. AKP-MHP înkarkerdişê kurdan de, komplo de israr kenê. Hêzê ke mîyanê nê komployî de ca girewt nika hîna hol vînenê je têgêrayîşê azadîye, şarê kurdî û Rayber Apo komplo zelal kerd, nêverda ke nê hêzî biresê armancê xo. Hînî nê hêzî sucdarîya xo qebul kenê. Ganî nê hêzî şarê kurdî , Rayber Apo û têgêrayîşê azadîye ra efûya xo biwazê.

Têkoşînê şarê ma yê Mexmûrî 26 serr ê ke dewam keno. Şarê Mexmûrî fedakar o. Tewirê şarê Mexmûrî û Şengalî tewirêko rûmetên o. Ambargoyê Hukmatê Başûrê Kurdîstanî zî nêno qebulkerdene. No ambargo vera yewîya kurdan o û zulm o. No ambrago heman wextî de seba DAÎŞî sey dawetîye yo. Ganî nê çîyan ra fek vera bêro dayene. Ez reyna xoverdayîşê şarê Şengalî û Mexmûrî fîraz kena.

Rayber Apoyî seba ke zerarêk nêra Sûrîye ser uca ra vejîya û vat; 'Ê do Sûrîye ra qesas bigêrê.' Nê hêrişê vera Sûrîye, xîretê parçekerdişê erdê Sûrîye pêro seba nê qesasî yê. Rûsya zî vîze da înan ke hêrişê kurdan bikerê. Efrîn de rîyê hewayî tirkan ra akerd. DYA zî Girê Sipî û Serêkanîyê de destûr da Tirkîya ke hêrişê Rojawanî bikera. Nê her di dewlete zî estbîyayîşê şaran û azadîya şaran ser o bazarîya kenê û pêşkêşê yewbînan kenê. Sîyasetêko bêexlaq o. Çareserîya nînan yewîya şaran a. Konfederalîzmo demokratîk o. Îdareyo xoser o.

Şarê ma 21 serr ê ke têkoşînêko bêhempa, ercaye û rûmetên kerd. Şarê ma nêverda ke komplo bireso armancê xo. Semedo bîn ê tecrîdê Rayber Apoyî vergirewtişê xeta azadîya cinîyan o. Têkoşînê ma heta nika nêverda ke komplo bireso armancê xo û îradeyê şarî kerd pîl. Elbet kêmasîya ma zî esta. Rayber Apo hema zî binê esaretî de yo. Ganî ma dormeyê Rayber Apoyî de xeta xoverdayîşî pîl bikerê.

Nika şarê ma têgêreno. Sey her serre Ewropa de rayraşîyayîşê pîlî, çalakîyî, nawnayîşî estê. Rojhelat, Vakur, Başûr, Rojawan, Mexmûr, Şengalê Kurdîstanî de zî çalakîyan dest pêkerd. Rojhelato Mîyanên wayîrê Rayberê xo vejîyeno. Nê wextî de zî têkoşîn reyna dewam keno. Bi na wesîle ez vanga her kesî dana ke bi çalakîyanê 15ê Sibate sînordar nêmanê. Hînî prosesêko newe esto. Ganî nê çalakîyî heta 4ê nîsane dewam bikerê. Heman wextî de ganî mîyanê serre de zî no têkoşîn bêro berzkerdene. Ez venga hunermendan, roşnvîran, azadîwaştoxan, enternasyonalîstan cinîyan û ciwanan dana ke wayîrê fikrê Rayber Apoyî bivejîyê. Azadîya ma pabesteyê azadîya Rayber Apoyî ya. Têgêrayîşê ma her wextî ra bihêzêr o, gerîlayî têkoşînê xo berz kenê û wayîrê Rayber Apoyî vejîyenê. Ez xoverdayoxanê zîndanan rê selam kena. Na serra newîye do hêzanê komplogeran, zîhnîyetê pederşahî çin bikerê û cuya hembaşe ya demokratîke awan bikera. Nê esasî ser o ez nê tekoşînî zî nika ra selam  kena.''