Endama Konseya Hemserekîya Pêroyî ya KCKyî Sozdar Avesta tecrîdê Îmraliyî, Peymana Şingalî, hêrişê PDKyî, grevê vêşanîye, xoverdayîşê gerîlayan û Hemleya 'Wext Wextê Azadîye yo' ANFyî rê ercnayî.

Qiseykerdişê Avesta ra beşêk wina yo:

''Weçînayîşê Amerîka ra dima binkewtişê Trumpî zaf tesîrê Erdogan û dewleta tirke kerd. Biden û Ewropa do vera dewleta tirke polîtîkayan bikerê. Oyo ke Rojhelatê Mîyanênîde wayîrê proje û perspektîfan o şarê Kurdîstanî yo û Rojawan zî mîsalê ney o. Modelê Rojawanî coka maruzê hêrişanê dwleta tirke beno. Serra 2020î seba şaranê azadîwaştoxan serra xoverdayîş û têkoşînî bibî. Serra 2021î zî do biba serra sîstemê demokratîkî, cinî û şaran.

Heta ke Rayber Apo azad nêbo haştî û demokrasî do nêrê. Hêzê komplogerî seba ke sîstemê demokratîkî ra tersenê Rayber Apo tecrîd kenê. Mesuldarê nê tecrîdî hêzê mîyanneteweyî yê. Raporê CPTyî ra dima Ewropa wezîfeyê xo nêkerd. Rayber Apo vera sîstemê tecrîdî xo ver dano. Ma bi Hemleya 'Wext Wextê Azadîye yo'  esasê azadîya Rayberîye ser o çalakîyanê xo dewam bikerê.

Çalakîya tewr pîle zî zîndanan de ya. Zîndanan de zulm estu; nêweşî tedawî nêbenê, vera Korona tedbîr nêgêrîyeno. Rewşa zîndanan rewşa 12ê Êlule ra beter a. Tepişteyî bi grevê vêşanîye tewrê Hemleya 'Wext Wextê Azadîye yo' bîyî. Ganî pêro roşnvîr, hunermend, dezgeh, rêxistin, hêzê demokrasîyî û şarê Kurdîstanî wayîrê xoverdayîşê tepişteyan vejîyê.

Rîyo raştikên ê AKP-MHPyî eşkera bi. No îqtîdar vera kurdan pêro metodê zulmî xebitneno. Hînî xora AKP nêmend, MHP aqil dano ci. AKPyî ge ge seba menfaatanê xo meseleya kurdan qebul kerde. Bi vatişê 'reformî' zî îqtîdar wazeno xo bierzê çimanê Ewropa û Amerîka. Tirkîya de krîz, kişîyayîşê cinîyan, feqîrî û vêşanîye asta tewr berze de yê. Tek rayîrê xelisîyayîş xoverdayîş û têkoşîn o. Şarê Kurdîstan û Tirkîya têna Erdoganî ra bixelisê xo bibê azad. Erdogan û Bahçelîyo faşîst pê weçînayîşî nê têna pê têkoşîn û xoverdayîşî do birijê.

Îqtîdarê AKP-MHPyî tewr zaf hêrişê cinîyan, sîstemê hemserekîye û destkewteyanê cinîyan keno. Vera naye Vakurê Kurdîstan, Rojawan û Tirkîya de cinîyî xo ver danê. Kurdîstan de cinîyî maruzê hêrişan ê bêexlaq û dişmenkeran manenê. Hêrişê tecawuzî zî hêrişê plankerde yê û yew merkezî ra îdare benê.

Tecawuzê Kercewsî serebûtêko verên nîyo. Dewlete bi dezgehanê şerê taybetî serebûtanê tecawuzî îdare kena. Ganî cinî û ciwanê Kurdîstanî vera nê kerdişan tewirê xo bimojnê. Ganî şar, dost û ciwanê ma bi sereyê xo nê tecawuzkeran ra hesab bipersê.

Ma zî sey Têgêrayîşê Azadîye yê Kurdîstanî pê têkoşînê xo nê tecawuzkeran ra hesab bipersê. Sebama xopawitiş wezîfeyêko stratejîk o. Coka Hemleya 'Ma xo pawenê' zaf girîng a. Ez venga pêro cinîyan dana ke vera tacîz û tecawuzan bibê yew û têkoşînê xo berz bikerê. Hêzê cinîyan eşkeno pêro dîktator û sîstemê pederşahîye birijno. Ganî cinîyî pê xo bawer bikerê û xeta azadîye de têkoşîn bikerê.''

Do dewam bikero...