Endama Konseya Serekîya Pêroyî ya KCKyî Sozdare Avesta hêrişê dewleta tirke yê vera Şingalî de ANFyî rê ercna.

Avesta bale ante nê xususan ser: ''Dewleta tirke ya îşxalkere 16-17ê tebexe de reyna hêrişê şarê ma yê êzidîyan kerd. Nê hêrişan de serkêşanê şarê êzidîyan ra embaz Seîd Hesen û birarzayê ci şervanê YBŞyî Îsa Xwededa şehîd bîyî, reyna hêrişê vera nêweşxaneyî de 4 şervanê YBŞ û 4 xebatkarê weşîyî şehîd bîyî. Wird hêrişan de birîndarî zî estê. Şexsê fermandar embaz Seîdî de ez heme şehîdanê ma bihurmet yad kena û keyeyanê şehîdan û şarê ma rê serweşîye wazena.

No hêrişê dewleta tirke nê verên û nê zî peyên o. Dewleta tirke û Erdogan vera şarê êzidîyî û kurdan hêrişanê xo domnenê. Hêrişê raştê serrgêra şehadetê Mam Zekîyî ame. Seba ke Şingalî veng bikerê bi serran o hêriş kenê. 15 serrî yo bêmabên fermanê vera êzidîyan dewam keno. Seba ke embaz Seîd vera nê hêrişan peyser game nêeşte sey hedefî ame girewtene.

Nê hêrişî vera Iraqî zî mesajêk o. Serekkomarê Iraqî reya verêne waşt Şingalî zîyaret bikero. Embaz Seîd zî bitaybetî semedê zîyaretî amebi dawetkerdene. Badê hêrişî têna asayîşê Iraqî ra yew eşkerayîye ameye. Ne serekkomarî ne zî selahîyetdarêkê bînî eşkerayîye nêdaye. Şarê êzidîyî do nayî qebul nêkero. Hukmatê Iraqî ganî qetilkaran vejo werte. Bêvengîye înan kena hemkarê qirkerdişî.

Çend rojî yo vera şarê êzidîyî hêrişî benê, hendê kesî ameyî qetilkerdene  la vengê hukmatê Başûrê Kurdîstanî nêvejîyeno. Qetilkarî xora eşkera yê. Ganî vera hêrişan tewiro zelal bêro ramojnayene. Amerîka û hêzê bînî yê mîyanneteweyî yê ke vera hêrişan bêveng ê xora ê zî qirkerdiş de ca genê. Seba ke nê hêzanê 9ê teşrîna verêne de derheqê Şingalî de pêkerdiş kerd, nê hêrişî benê. Pêkerdişê 9ê teşrîna verêne pêkerdişê fermanê 74. o.

Îradeyo ke dewleta tirke, PDK û hêzê mîyanneteweyî 15 serrî yo nêeşkenê bişiknenî, pê nê pêkerdişî kenê ke bişiknê. Pê hêrişê 17ê tebaxe mesaj da ke  ya no pêkerdiş yeno qebulkerdene ya zî ê do qirkerdiş bikerê. Pêkerdiş çiyo? Pêkerdiş vengkerdişê Şingalî yo, bêîradekerdişê şarê êzidîyan o coka şarê êzidîyî do çirey nê pêkerdişî qebul nêkero.

Şarê Şingalî wazeno azad biciwîyo. Iraq asayîşê Şingalî ra berpirsîyar o. Seba ke serekkomar pêvînayîş bikero nêeşkayî yew roje warê hewayî biqefilnê? Hende bêîrade yê. Ganî hukmat û şarê Iraqî na hele ra tepîya şarê êzidîyî reyde bibê yew û vera hêrişan vejîyê. PDK ganî hinî polîtîkaya xo ya xayîne ya vera Şingalî caverdo.

Hema ke darbanê şarê Şingalî ra gonî ameyêne, hema ke teyareyê dewleta tirke Şingalî ser ra gêrayêne, çapemenîya ke hetê MÎTê tirkî û tay hêzanê ke Başûr de yê ra yena îdarekerdene, herêma nêweşxaneyî sey qerargehê PKKyî lase kerd. Na bêehleqîye û bêşerefîyeya pîl a. Ê zî zaf hole zanê ke ûca de nêweşxane esto û kam tede yo. Înanê ke no qikerdiş kerd do verê tarîxî de hesab bidê nê şarî.

Şarê ma qerardar o, nêterseno, wazeno azad biciwîyo. Şehadetê pîlî vejîyayîşanê xurtan afernenê. Dejê pîlî qeraranê pîlan vejenê werte. Hêriş hetê dewleta tirke ra ame kerdene la  rolo pîl ê hêzanê xayînan ê herême zî tede esto.  Ma ganî xayînan mîyanê xo ra vejê Kam beno wa bibo kesêko xayîn nêeşkeno bibo êzidî. Wa şarê ma bibo yew, dejê xo biaçarno xoverdayîşî. Ma do qesasê şehîdanê xo bîgirê û têkoşînê înan biresnê serkewtişî. Ma do miheqeq ser bikewê.''