Kongreya 4. ya Meclîsê Xoserîya Demokratîke yê Şingalî (MXDŞ) dewam kena. Endama Konseya Serekîya Pêroyî ya KCKyî Sozdare Avesta mesajo nuştekî şawit kongre.

Avesta bale ante muhîmîya kongre ser û vat: ''Ganî sere de cinî û ciwanî her kes wayîrê xoserîye vejîyo. Êzidîyî heqanê xo yê meşruyan wazenê. Semedê destfînayîşê xoserîye ma rojanê muhîman de yê. Fermanê vera êzidîyan heme dinya de yeno naskerene. Parlamentoyanê Belçîka û Hollanda qirkerdiş qebul kerd. La no têna nêvejeno. Ganî no qerar bêro caardene. Bitaybetî ganî ma pê xo bawer bê û Xoserîya Demokratîke ya Şingalî bigîrê binê garantî.''

Avesta qirkerdişê vera yahûdîyan sey nimûne ramojna û vat: ''Waştişê êzidîyan ronayîşê dewlete nêyo, têna wazenê herra xo ya bimbareke de azad biciwîyê.  Xoserîye heqê ma yo. Wa her kes bizano ke şarê êzidî hinî eşkeno xo bipawo. Êzidîyî pawitiş û îdareyê xo teslîmê çewî/e nêkenê. Qanûnanê Iraqî de zî cayê nê esto. Dewleta tirke ya îşxalkere wazena verê nayî biqefilno. PDK zî eynî çî keno. Eke Iraqî reyde bi hewayêkê zelalî bêro qiseykerdene Iraq dîyalogî rê qefilnaye do nêmano. Pê xebata hole û dîyalogî problem do bêro çareserkerdene. Ganî heqê êzidîyan bêrê dayene. Zirarê êzidîyan do Iraqî rê mebo.''

Sozdare Avesta vat: ''Ganî heme êzidîyî agêrê herra xo ya bimbareke.  Wa şarê ma peyser agêro erdo xo û cuya newe înşa bikero.  Sere de êzidîyê ke Ewropa de yê ganî heme êzidîyî semedê Xoserîya Şingalî xebatanê xo zafêr bikerê. Ciwanê êzidîyan zî tewrê YBŞ, YJŞ û Asayîşî bibê. Cinîyê xoverdayoxî yê Şingalî zî wa semedê Êzidxanê Xoser û Demokratîkî serkêşîye bikerê. Reyna heme eşîr zî ganî rolê xo kay bikerê. Ma prosesê tarîxî û muhîm de yê. Ganî yewîye bêro pîlkerdene û qezencê şarê êzidîyan esas bigêrîyê.''

Avesta vat: ''Ma sey komelê êzidîyan Rayber Apoyî rê minetdar ê. Rayber Apoyî komelê êzidîyan emantê ma kerd. Ma reyna soz danê Rayber Apoyî ke ma do her wextî ra zafêr komelê êzidîyan rê xizmet bikerê.''