22 serrî yo Rayberê Şarê Kurdî Abdullah Ocalan Zîndanê Îmraliyî de binê tecrîdî de yo. Endamê Komeleya Huqûqnasanê Seba Azadîye (OHD) Avûkat Riza Polatî derheqê Komployê Mîyanneteweyî yê vera Abdullah Ocalanî de ANFyî rê qisey kerd.

15ê Sibata 1999î ra nata Ocalanî reyde pêro kurdî zî tecrîdkerde yê. Platî vat: ''Tecrîd bi hawayêkê dişmenî yeno caardene. Her çiqas Birêz Ocalan Îmrali de mîyanê dêsan de yo zî fikr û pêşnîyazê ey pêro dinya ra vila bîyê. Ewro Komplo pê sîstemê tecrîdî yê taybetî dewam keno. Ewro Rojhelatê Mîyanênî de bi mîlyonan kurdî binê tecrîdî de yê. Ewro modelê Birêz Ocalanî seba pêro dinya nimûne yo. Hêzanê serdestan waşt verê nê modelî bigêrê.''

Polatî da zanayene ke vengê Ocalanî seba pêro dinya hêvî ya û wina dewam kerd: ''Key Birêz Ocalanî meseleya kurdan ser o qisey bikero tecrîd beno şenik aramîye virazîyena. Tecrîd armanc keno ke verê çareserîyan bigêro. AKP-MHP coka vera tecrîd kenê giranêr. 2009î ra nata ma na rewşe vînenê.''

Polatî nêzdîbîyayîşê CPTyî wina ercna: ''CPTyî raporê xo yê peyênî de tecrîd îsbat kerd. La no çi têna raporan de mend. Ganî CPT û dezgehê bînî yê Konseya Ewropa vera tecrîdî tewirêkê xurtî bimojnê. Ewro tecrîdê Îmraliyî pêro zîndanan de yeno caardene.''

Riza Polatî grevê vêşanîye yê tepişteyan ê vera tecrîd û binpaykerdişanê heqanê xo vist vîrî û vat: ''Grevê vêşanîye roja 76. de yo la hema zî selahîyetdaranê dewlete ra veng nêvejîya. Nê grevî reyde teda û zorbazî zî zêdîyayî.Waştişê tepişteyan huqûqî yê. Ma venga komel û huqûqnasan danê ke wa nêverdê dewlete tepişteyan terkê mergî bikera. Grevê vêşanîye yê 2018î de 8 tepişteyan dinyaya xo bedilnaye. Seba ke ancî wina nêbo ganî ma bibê vengê tepişteyan û ma înan têna nêverdê.''