Wekîlê HDPyî yê Çewlîgî Erdal Aydemîrî pê vernîyazêkê persî meseleya awe ya Çewlîgî berde Meclîsî û waşt ke Wezîrê Binawanîye û Resayî Adîl Karaîsmaîlogluy cewab bido vernîyazî.

Aydemîrî da zanayene ke Çewlîg merkezê awe yo la bêawe yeno verdayene. Aydemîrî vat: ''Dormeyê Çewlîgî pê çimeyanê awe girewte yo la hema hema pêro taxanê şaristanî de awe yena pêsnayene. Sebebê nê pêsnayîşan teknîk nîyo. Semedo ke çimeyê awe bi hawayêkê raştî nêşuxilîyenê awe pêsîyena. Reyna çimeyanê awa şimitişî ra nêweşîyî vila benê la derheqê na babete de eşkerayîyêke nêdîyena.''

Aydemîrî vernîyazê xo de nê persî pers kerdî:

-Çira awe tim yena pêsnayene?

-Sebebê nê pêsnayîşî arizaya teknîke ya yan zî xebatêk a?

-Semedo ke verê pêsnayîşî bêro girewtene şima do xebatêke bikerê?

-Çira awe bena sebebê nêweşîyan? Şima do na babete de xebatêke bikerê?