Hemserekê Kongreya Komelê Demokratîkî (KCD) Berdan Ozturk, Hemserekê Partîya Herêmanê Demokratîkan (DBP) Salîha Aydenîz û Keskîn Bayindir Çewlîg de startê zîyraretanê xo da ke do hewteyêk dewam bikerê.

Hemeserekê HDPyî yê Çewlîgî Arzu Firat, Hasan Soysal û Wekîlê Çewlîgî Erdal Aydemîr û Hetkarê Hemserekanê Pêroyîyan ê HDPyî yê Komîsyonê Ekolojî ra Berpirsîyar Nacî Sonmez zî heyet de ca genê. Heyetê KCD û DBPyî verî herêma Suvêranî yê qezaya Dara Hênî ke 25ê hezîrane de tede şewat vejîya û dare û birrî vêşayî bîyî wel, uca zîyaret kerd û eşkerayîyêke daye.

Nacî Sonmezî ke tîya qisey kerd ard ziwan netîceya polîtîkayanê dewlete de qirkerdişê xoza, şer û pêkewtişî Kurdîstan de qewimîyenê û vat ma Çewlîgî ra veng danê heme têgêrayîşanê ekeolîjî ke ekolojî têne pawitişê dormeyî nêyo eynî wextî de têkoşînê vera şerî yo. Sonmezî vat ganî têkoşînê ekolojî yê Tirkîya vera rijnayîş û talano ke vera xozaya Kurdîstanî beno zî bêro rayraberdene.

Salîha Aydenîz zî manzaraya şewatî sey dişmenîya îqtîdarî ya vera kurdan name kerde û vat: ''Ma hela ke ameyî Çewlîg ma waşt verî dişmenaya îqtîdarî ya vera kurdan pê nê şewatî vînê. Ma zî sey heyetî ewro tîya de yê. Manzaraya ke ma vînenê polîtîkaya dewlete ya se serran a ke vera kurdan yena rayraberdene. Ma reyna dî ke îqtîdar senî dişmenîya kurdan keno. Tîya warêko zaf hîra bi rojan bizanayîş ame vêşnayene. Şewatê nê daristanî şewatanê Başûr, Rojawan, Girê Sipî û Serêkanî zî rena fîneno çiman ver. Dîcle û Aricak de bizanayîş bi desan cayî ameyî vêşnayene. Binê nameyê operasyonî de cografyaya Kurdîstanî bi hewayêkê zanayeyî hetê dewlete ra yena vêşnayene. Çunke wazenê nê cayan bikerê veng. Eşkerayo ke metodê pê qirkerdiş qedînayîş ser nêkewno. Ê se kenê wa bikerê nêeşkenê verê têkoşînê azadîye yê şarê kurdî bigêrê. Şarê kurdî do pawitişê kultur, statu, ziwan û xozaya xo rê dewam bikero.''

Zîyaretê heyetî herême de  do dewam bikerê.