Bernameyê 'Wext Wextê Yewîya Neteweyîye û Azadîye yo' yê KCD, DBP û HDPyî Mêrdîn de dewam keno. Hemserekê DBPyî Salîha Aydenîz, Wekîlê HDPyî Ebru Gunay û Pero Dundar û îdarekarê Rêxistina HDPyî ya Mêrdînî hemwelatîyan reyde ameyî pêser. Heyetî goş da meseleyanê esnafan ser û venga her kesî da ke 25ê sibate de Qoser de tewrê bernameyê peyênî bibo. 

Heyetî dewanê Menteşî û Warga Xensê yê Dêrikî de şarî reyde kombîyayîş kerd. Salîha Aydenîz nameyê heyetî ser qisey kerd û vat: ''Tecrîdê Îmraliyî pêro welatî rê vila bîyo, vera kurd û cinîyan tedayê giranî estê. Ma zanenê ke kurdî pê nê polîtîkayan qayîl nîyê.''

Aydenîze îfade kerd ke heta kurdî yew nêbê destkewteyê înan do çin bibê û vat: ''Ma yewîya kurdan û wedaritişê tecrîdî wazenê.Kurdî cuya bêstatu û bêziwanê dayîke qebul nêkenê. Heta ke tecrîd biqedo, têdûştî bêra caardene ma do têkoşînê xo dewam bikerê û wayîrê destkewteyanê xo vejîyê.''

Dima şarî fikrê xo ardî ziwan û da zanayene ke îqtîdar kurdan rê edîl nîyo  û waşt ke kurdkî wa biba ziwanê fermî.