Devran Dînç (21) 30ê nîsane de qezaya Baglarî ya Amedî de keyeyê xo ra vejîya û a roje anêgêra keye. 4ê gulane de mabênê Berê Riha û Berê Çifteyî de Sûr de meyîtê Devranî ame dîyene ke no ca nêzdîyê noqtaya polîsan o.

Cenazaya Dînçî seba testê Korona wedarîya Nêweşxaneyê Gazî Yaşargîlî. La keyeyê Dînçî ra raporo verên ê otopsî nêdîya. Keyeyê Devranî îfade keno ke Devran asosyal bi, hewteyêk de rey şîyêne teber, embazê ci çîn bî, cixare û kundox nêxebitnayêne û têna saz cinayêne, kitab wendêne. Wextê vînbîyayîşê Devranî de keyeyî muracatê kamyew qereqolî kerd zî çewî seba Devranî xîret nêkerd. Goreyê Keyeyê Dînçî mesûldarê verênî yê mergê Devranî zî nê kesî yê.

Babî Îsmet Dînç derheqê serebûtî de Ajansê Mezopotanya (MA) reyde qisey kerd.

''Lajê mi 30ê nîsane de keyeyî ra vejîya. A roje xalê xo ra vato ke ê do saete 23.00 de pîya abigêrê keye. La lajê mi nêame. A şewe telefon de naja xo rê vat ke o hê Sûr de yo. Domanê mi heta saete 04:00 Sûr de gêrayî Devran. Dima ma şîyî polîs û ma persa ke lajê ma destê înan de yo yan nê. Polîsan vat nê destê înan de yo ne zî nêweşxane de yo. Ez, dadîya ey, wayûbirayê ci ma reyna şîyî Sûr ke bigêrê ci. Ma Mudirê Pêroyî yê Asayîşî ra telefon kerd ke la înan ma rê vatê 'Lajek 21 serre yo, ma nêeşkenê çîyêk bikerê.' Vat Qereqolê Baglarî rê telefon bikerê. Qereqolê Baglarî zî heman çi vat. Ma zî şîyî Qereqolê Sûrî û uca ra reyna şîyî Qereqolê Baglarî. Ma hînî peynî de vat ke qedexeyê vejîyayîşê teberî esto, destûr bidê ma ke ma bigêrê lajê xo. Înan qebul nêkerd. La ma destpê cigêrayîşî kerd. Ma şîyî qereqolê Berê Sarayî û Berê Mêrdînî zî. Ma waşt ke wa biewnîyo kamerayanê mobese. La tim vatêne 'lajê şima do abigêro keye.' Rojêk polîsan ma rê telefon kerd vat înan Devran dîyo. Ma şîyî la Devran nêbi, lajêko 15 serre bi. Polîsî zî zî qet goreyê qaîdeyanê cayê serebûtî tênêgêrîyayêne. Devran roja ke vîn bîyo kişîyayo. Cayo ke meyîtê lajê mi ame dîyeno, tede ne telefon anceno ne zî berê ci yo eşkera esto. Lajê mi paştê xo ra 4, rî û qirikê xo ra zî derbî girewtê. Eşkera yo ke pê îşkence kişîyayo. Wexto ez gêrayêne lajê xo mi her çi qeyd kerdêne. Mi vatêne eke çîyêk bêro sereyê lajê mi ê mesûldar şima yê.

Embazê Devranî, zaf çinbî, nêşîyayêne kuçe yan zî qehwexaneyan. Hewte de rayêk şîyêne Sûr. Sazê xo cinayêne, kitabê xo wendêne.''