Endamê Fermandarîya Qerargehê Merkezê HPGyî Bahoz Erdalî Radyoya Dengê Kurdîstanî rê derheqê rojdemî de qisey kerd.

Erdalî sere de bale ante têkoşînê gerîyalan ser vat: ''Rixmê aşmanê payîzî gerîlayê Kurdîstanî bi xoverdayîşêkê pîlî heme plananê dişmenî pûç vejenê. Bitaybetî herêma Serhadî de rixmê heme teknîkê dişmenî gerîlayanê ma darbê pîlî dayê înan ro. Bi na wesîle ez gerîlayanê Serhadî û heme hêzanê gerîlayanê ma selam kena, înan fîraz kena, destê şima weş bê.''

Erdalî derheqê hedîseya herêma Behînanî de zî nê vatî: ''Wa her kes bizano ke hêzanê ma çirey hêrişê  nuqtayanê pêşmergeyan ê Zaxo û Duhokî nêkerdo. Reyna ma çirey hêrişê hêzanê asayîşî yê hukmatê herême zî nêkerd, do nêkerê. Hêzê pêşmergeyan bi heme çekanê xo yê giranan û wesayîtanê zirxinan ameyî ma ser, waşt ke bikewê waranê gerîlayan. No zî bi sebebê pêkewtişî. Eke qerargehê ma yê merkezî mudaxale nêkerdêne beno ke pêkewtiş bibîyêne pîl. Ma şer nêwazenê. Gerîla cayê xo de yo. Ê yenê gerîlayan ser ke şarê kurdî îkna bikerê ke 'PKKyî herême îşxal kerda' la ê zî zanê ke bi nêvatişî cavêrd şarê kurdî nêeşkenê pêşmergeyan zî îkna bikerê.

Gerîlayê PKKyî  36-38 serrî yo herême de yê. PDK ge vano 'PKK hêzo xovedayox o, waybirayê ma yê,' ge vano 'îşxalker o.' Wextê xoverdayîşê vera DAÎŞî û xoverdayîşê Zapî yê 2008î de serekê ci ra heta kademeya cêrîne yê PDKyî xoverdayîşê gerîlayan pîroz kerd. Ne şar ne zî pêşmergeyî estbîyayîşê gerîlayan ra bêrehat ê. Başûrê Kurdîstan di problem estbîyayîşê gerîlayan nê estbîyayîşê 37 baregehanê artêşa tirkî yo. Xora vatişê 'PKK nêverdeno dewijê agêrê dewanê xo' zî, her kes zaf hol zano ke raşt nîyo. Eke PDK destur bido Çemço ra heta Zap, Avaşîn, Nehle a heta Garê, Bradostî her kes agêreno dewanê xo. Wa bêrê vajî ma xizmet şarî rê kerdêne şima destur nêda. Qet yew projeyê înan semedê xizmetê şarî çîn o. Bi nê vatişan her hetî ra wazenê xo biheq ramojnê.''

Endamê Fermandarîya Qerargehê Merkezê HPGyî Bahoz  Erdalî cewab da vendayîşê heme partî û dezgehanê kurdan û vat: ''Wa her kes bizano ke ma şer nêwazenê. Ma eşkera vanê ke no şer kurdan rê xizmet nêkeno. Ma tim dîyalogî rê amade yê. Ganî no pers PKDyî rê bêro persayene, şima zî dîyalogî rê amadeyê? Ma pêşmergeyanê Başûrê Kurdîstanî sey dişmenî nêvînenê. Ma heme partîyanê sîyasîyan sey qezencî vînenê. Eke ê zî amedeyê ma cade siba masa de ronişê problemanê xo hal bikerê. Mesrefo ke kerdo hêzê leşkerî herême de ca kerdî wa herinda naye de şarî rê xizmet bikerê.''

Bahoz Erdalî vat: ''Erdogan û partîya ci çend dişmenê kurdanê Vakurê hende zî dişmenê kurdanê Başûrî yê. Selahîyetdarê PDKyî ganî semedê ameyoxê Başûrê Kurdîstanî stratejîk bifikiryê. Ganî Mesut Barzanî emrê ci yo ke mend hinî semedê yew partî nê semedê yewîya neteweyîye ya kurdan bişuxulno. Gerîlayê PKKyî semedê pawitişê heme Kurdîstanî şer kenê. Seba ke ma Şingal, Mexmûr, Hewlêr û Kerkuk de vera hêrişê DAÎŞî pîya bi pêşmergeyan şerd kerd, ma zanê ke xeylêk fermandarê pêşmergeyan nêwazenê vera gerîlayan şer bikerê. Eke pêkewtişêk vejîyo AKP-MHP cira qezenc keno.  Ma hema vizêr pîya eynî perrî de şer kerdênê, embazê ma şehîd bîyî. Ewro qey ma vera yewbînan şer bikerê. Kayana mexapîyê. No şer ma rê dano vînîkerdene, dişmenî rê dano qezenckerdene.''