Serekanê baroyanê Mûş, Riha, Amed, Şirnex, Sêrt, Wan, Colemêrg, Agirî, Semsûr û Bedlîsî verê Edlîyeya Êlihî de vera darbeya qeyûman nêrazîbîyayîşê xo mojna. Hemsereka Komeleya Huqûqnasan a Seba Azadîye (OHD) Ekîne Yeter zî tewra eşkerayîye bîye. 

Serekê Baroyê Êlihî Hamît Çakanî vist vîrî ke reya hîrêyîn a ke qeyûmî yenê tayînkerdene û vat: ''Îradeyê şarî ameyo îpotekkerdene. Protestoyanê vera qeyûman de xeylê kesî raştê hêrişanê polîsan ameyî.''

Serekê Baroyê Mûşî Kadîr Karaçelîkî polîtîkaya qeyûman vurîyaya  bîya rejîmêkî û vat: ''No rejîm meşrû nîyo. Meşrûtîya ci ya huqûqî û komelkî nîya. Ma veng danê ke wa cade no kerdiş bêro wedaritene. Wa huqûq bêro caardene. Ganî meqamê muhakemekerdişî goreyê huqûqî têbigêrê. 

Heqê polîsan çin o ke hêrişê protestoyanê demokratîkan bikerê. Ma nê binpaykerdişê heqan qebul nêkenê. No zemînê îşkence û muameleyanê xiraban amade keno. Ganî îradeyê şarê Êlihî rê hûrmet bêro mojnayene.''

Dima huqûqnasan Hemşaredarê Êlihî zîyaret kerdî.