Akademîsyenanê Zanîngehê Silêmanî yê Başûrê Kurdîstanî de seba ke meaşê înan nêdîyayî dersî boykot kerdî.

Rojanê peyênan de xeylêk sektoran de grev û boykotî est ê. Akademîsyenanê Zanîngehê Silêmanî zî dersî boykot kerdî. Akademîsyen û personelanê zanîngehî eşkerayîye daye çapemenîye û waşt ke cade meaşê înan bêrê dayene.

Destpêkê hewteyî ra nata qezaya Koyî ya Hewlêrî, Silêmanî, Germîyan û Raperîn de karker û mamostayî çalakîyan kenê.

27ê adare de Wezîrîya Malîye ya Iraqî seba xebatkaranê umûmîye qasê 200 mîlyar dînarî budçeyêke dabî kişte. La meaşî nêdîyayî. Başûr de bêusûlîye ra şar tim meydanan de yo.