Hemserekê Konseya Rayberdişî ya KCKyî Cemîl Bayikî bi wesîleya serrgêra 42. ya ronayîşê PKKyî ANFyî rê qisey kerd.

Qiseykerdişê Bayikî ra beşêk wina yo:

''PKK debikewo serra 43. zî têkoşînê têgêrayîşê ma yê azadîye serra xo ya 48. de yo. Seba Rayber Apo têkoşînêko 50 serre esto. Têkoşîn û erjê ke 500 serran de afirîyenê 50 serran de afirîyayî. Têkoşîno ke Rayber Apo rayberîya ci keno, bi 3-4 neslan dewam kerd. Komelî bi nasnameyê xo  bi wayîrê kulturê xoverdayîşî. Ganî qîmet û têkoşînê nê 50 serran bêrê famkerdene.

Xeta çalakîye, rêxistinî, polîtîk û îdeolojîke ya PKKyî her hetî ra tecrubeyêko girîng vet werte. Nê pêro ganî sey hêzê pîlî yê têkoşînî bêrê dîyenê. Ma vajê her keyeyî şehîdêk/e da/ye, gazîyê/a ci esto/a. Nê têkoşînî xo resna pêro kurdan; kurdî bi temamî vistî mîyanê nê têkoşînî. Coka no têkoşîn bi hawayêkê pêroyî vurîya têkoşînê şarî.

PKK nika têkoşînêkê winasênî rê, hêz û paradîgmayêka newîye rê rayberîye keno. Bi paaradîgmaya komelê demokratîkî û azadîperwerîya cinîye, hêzê têkoşînî û ristimê ci des qat zêdêr xurtêr û bitesîr kerd.

Wexto ke rayberîyêka raştikêne bêra kerdene, têkoşînê nê şarî bi rayîrê na paradîgma beno wayîrê karakterêkê winasênî ke bin nêkeweno. Coka kurdî teqez do ser bikewê. PKK têna sena kurdan nê seba şaranê pêro Rojhelatê Mîyanênî vurîya hêzê azadîye. PKKyî bi modernîteya xo ya demokratîke, alternaîfê modernîteya kapîtalîzme aferna coka PKK rayîr mojnena pêro merdimîye. 

Hêz û xeta îdeolojîke ya tewr pîle paradîgmaya newîye ya kurdan a. Bi rayîrê na paradîgma têkoşînê şarî bi wayîrê karakterêko ke bin nêkeweno. Ameyox mîyanê na paradîgma de ya.

Ma sey PKK wayîrê nê ristim û tecrube yê, ma wayîrê îradeyê şorişgêrî yê ke têkoşînê na xete bikerê. Têkoşînê Rayberîye reyde mesuldarîya ma ya e ma xeta Rayberîye biresnê şaranê dinya û hêzanê demokrasîye. Fikrê Rayber Apoyî hînî her ca de şinasîyenê û fam benê. Serra 43. ya têkoşînê xo de ma do xeta Raybîye xurtêr bikerê û cuya demokratîk û azade ya kurdan, şaranê Tirkîya û Rojhelatê Mîyanênî zêdêr nêzdî bikerê.

Mefteyê çareserîya meseleyanê Tirkîya û Rojhelatê Mîyanênî fikrê Rayberîye de yo. Oyo ke hîşmendîya kapîtalîzmê modernîstî, neteperwerî û mezhebperestî werte ra wedaro û bawerî û nasnameyanê etnîkan azad bikero, Rayber Apo yo. Coka hêzê demokrasî ganî hem na xete zêdêr fam bikerê hem zî bivînê ke demokrasî têna bi îtîfaqan yeno caardene.

Eke dormeyê paradîgmaya Rayber Apoyî de têkoşîn bêro kerdene nê şarî do teqez bibê wayîrê cuyêka demokratîk û azade. Şarê Kurdî wa pê xo bawer bikero, wa bizano ke serê xeta Rayberîye de do ser bikewo. Kurdî serra 43. ya PKKyî de bi têkoşînê winasênî qetî do ser bikewê.

Ciwan û cinîyê kurdî wayîrê ê hêzî yê ke rayberîya nê serkewtişî bikerê. Nê esasî ser o ez bawer kena ke serra 43. de ma do ser bikewê. Coka ez selam, heskerdiş û hûrmetê xo pêşkêşê hêzan ê têkoşeran kena û înan rê serkewtiş wazena.''