Hemserekê Konseya Rayberdişî ya KCKyî Cemîl Bayikî tewrê 'Bernameyê Taybetî'yê Stêrk TVyî bi û rojdem ercna. Qiseykerdişê Bayikî ra beşêk wina yo:

''Ez şorişgêranê 14ê Temmuze bi rêzdarî yad kena. Xoverdayoxanê 14ê Temmuze mîyanê şert û mercanê giranan de vera sîyasetê 12ê Êlule sere wedarna û no sîyaset çin kerd. No serkewtişê felsefe û îdeolojîya PKKyî yo. Xoverdayoxanê 14ê Temmuze mojna ke ganî krîterê têkoşînî senî bibê. Nê krîterî seba kurda, milîtananê PKKyî, welatperweran û şorişê Kurdîstanî bîyî qanûnêk. Ewro Zap, Metîna, Avaşîn, Xakûrkê, Vakur û xeylêk welatan de pê ruhê Xoverdayîşê 14ê Temmuze têkoşîn yeno kerdene. Ewro gerîlayî Herêmanê Pawitişî yê Medya de mîyanê şert û mercanê giranan de têkoşîn kenê. Senî xoverdayoxê 14ê Temmuze ser kewtî gerîlayî zî do ser bikewê. 

Dewleta tirke pê çekanê NATOyî hêrişê Avaşîn, Heftanîn, Zap, Metîna û eyaletanê Vakurî kena û vera gerîlayan çekanê kîmyewîyan xebitnena. Hetêkî ra zî PDK waranê gerîlayan gêno binê ablûqa. Hulusî Akarî no waşt. Tay hêzê taybetî yê PDKyî estê ke pêşmerge nîyê. Nê hêzî gerîlayan gênê binê ablûqa. Rixmê ney zî artêşa tirke derbanê giranan wena. Ma do peynîya AKP-MHPyî bîyarê. Gerîlayî vera teknîkê dewleta tirke têgêrenê, derban danê ci ro. Nêverdenê îşxalkerî Başûrî îşxal bikerê. Hêrişî pîl ê la xoverdayîş û têkoşîn zî zaf pîl ê.

Welatperwerîye wayîrvejîyayîşê erjan, nasname, xoza û şarê Kurdîstanî yo. Ma vatêne qey PDK nê şerê vera Tirkiya de hetê ma de ca bigêro la wina nêbi. Tay hêzê PDKyî xîret kenê ke gerîlayan bigêrê binê ablûqa, gerîlayan teng bikerê, mabênê herêmanê gerîlayan de têkilîye bibirnê. Ê bi nê hawayî xizmetê dewleta tirke kenê. Xeylêk hunermend, roşnvîr, dostanê kurdan no qebul nêkerd û nêrazîbîyayîşê xo mojna. Mîsal Înîsîyatîfê Kurdîstanî Bipawê xeylêk karê girîngî kerdî. Ez înan bi na wesîle selam kena. Nika mabênê PDK û PKKyî de şer çin o. Mabênê dewleta tirke û PKKyî de şer esto. Vera ablûqakerdişê gerîlayan ganî xîret bêro kerdene. Gerîlayî seba rûmetê kurdan têkoşîn kenê ganî her kes wayîrê gerîlayan bo, paştî bido gerîlayan.Tay hunermendan Birêz Mesûd Barzanîyî reyde pêvînayîş kerd. Barzanîyî înan rê vato ke ê hê sozê xo yê verênî ser o yê. O çax wa no vate bêro caardene. Nê xîretê ablûqa biqedê. Eke no bibo mesele pê rayîrê dîyalogî çareser bena.

Erdogan her zere hem zî teber de xeylêk teşhîr bîyo. Erdogan seba ke îmajê xo sereraşt bikero şîyo Amed. Wa kes pê vateyanê ey bawer nêkero. Erdogan hînî nêeşkeno kurdan bixapîno. Erdogan Suleyman soyluyî reyde şîyo Amed. Soylu dişmen û kiştoxê kurdan o. Erdogan Amed de vera HDPyî qisey kerd. Çunke vera HDPyî prosesê qefilnayîşî da destpêkerdene. Erdogan seba ke verê nêrazîbîyayîşan bigêro wina qisey keno.

Wexto ke DAÎŞî hêrişê Şingalî kerd çewî vengê nêvet. Nika dewleta tirke hêrişê Şingalî kena reyna çew vengê xo nêvejeno. Hollanda û Belçîka jenosîdê êzidîyan qebul kerd. Eke wina kenê ganî vera hêrişanê Tirkîya zî têbigêrê. Na babete de tewr zaf mesuldarîya Iraqî esta. 

Ez şehîdanê Şorişê Rojawanî serrgêra ci de bi rêzdarî yad kena. Şorişê Rojawanî pê îdeolojî û felsefeya Rayber Apoyî awan bi. Coka no şoriş payan ser o mend. Dewleta tirke û hêzê bînî pê armancê qedînayîşê şorişî hêrişê Rojawanî kenê. Şarê Rojawanî xeta Rayber Apoyî ser o xo rêxistin kerd, her kes pê nasnameyê xo tewrê nê şorişî bi. Na rewle Rojhelatê Mîyanênî de xeylêk şaran rê bi model. Coka zaf beşî wayîrê nê şorişî vejîyenê.

3 serrî yo vera Mexmûrî ambargo dewam keno. No şermêko pîl o. Ganî no ambargo cade bêro wedaritene. Na rewşe seba şarê Mexmûrî zulm a. Şarê Mexmûrî vera îşxalî û kolonyalîzmî têkoşîn kerd. Semedo ke înan vera zulmî sereyê xo wedarna Mexmûr de ca bîyî. No amabrgo şerm o, wa wedarîyo.''