Hemserekê Konseya Rayberdişî ya KCKyî Cemîl Bayikî bernameyê taybetî yê Stêrk TVyî de tecrîdê Îmraliyî, zîyaretê CPTyî, xoverdayîşê gerîlayan, weçînayîşê Tirkîya û pêvînayîşê mabênê Tirkîya-Rûsya yê serê Rojawanî ercnayî.

Qiseykerdişê Bayikî ra tay noqtayê girîngî wina yê:

''Embaz Veysî Taşî vera tecrîdî bedenê xo da adirî ver. Ez ey bi rêzdarî yad kena. O seba şarê kurdî bi şehîd û seba azadîya Rayber Apoyî bi şehîd. Embaz Veysîyî vîdeoyê xo de venga her kesî da ke wa vera tecrîdî vindero. Ganî nê vengdayîşî ser o her kes mesuldarîya xo bîyaro ca. Dewleta tirke seba ke Rayber Apoyî ra qesasê xo bigêra ey tecrîd kena. Rayber Apoyî tim seba şarê kurdî û merdimatîye têkoşîn kerd. Şarê kurdî û dostê înan eşkenê bi têkoşînêkê pîlî polîtîkaya tecrîdî bişiknê.

CPTyî vato ke ey Îmrali zîyaret kerdo la nêvato ke Rayber Apoyî de pêvînayîş kerdo yan nê. Ganî CPT na babete ser o eşkerayîyêka zelale bido. CPTyo ke dezgehêkê Konseya Ewropa yo, erkê ci vergirewtişê îşkenceyî yo. La CPT nê erkê xo nêkeno. No zî yeno a mana ke CPT, Ewropa û dewleta tirke pîya polîtîkaya tecrîdî anê ca. Şarê kurdî û dostê înan her cayê dinya de seba azadîya Rayber Apoyî têkoşîn kenê. Mîsal dinya ra xeylêk avûkatan îmzayî arê dayê ke şorê Îmrali. Reyna Yewîya Baroyanê Tirkîya zî gamêka winayêne eşte.  Xîretê winayênî ercîyaye yê. La ganî hîna zaf çîyî bêrê kerdene. Ganî CP bêro protestokerdene. Reyna cezaya dîsîplînî dîyaya Rayber Apoyî. Nê cezayî huqûqî ney sîyasî yê. Dewlete bi nê hawayî kena ke îradeyê şarê kurdî û Rayber Apoyî bişikna û polîtîkaya qirkerdişî bîyara ca.

Dewleta tirke 10 serran ra pey reyna Paris de cinîyêka serkêşe ya têgêrayîşê azadîye hedef kerde. Dewleta tirke wazena îradeyê cinîyan ê kurdan bişikna. Çunke cinîyê kurdî vera DAÎŞî, El Nûsra û hêrişanê îşxalî şer kenê. A raşte dewleta tirke pê nê hêrişan wazena qesasê DAÎŞî zî bigêra. Dewleta tirke dişmena pêro kurdan a coka Efrînî ra heta Silêmanî û Ewropa kurdan kena hedef. Hetê bînî ra şarê Fransa bi xurtî wayîrê şehîdanê Qirkerdişê Parisî vejîya. Çunke şarê kurdî bi taybetî cinîyan ê kurdan vera DAÎŞî Fransa pawite. No zî destkewteyêkê têkoşînê cinîyan o. Dewleta Fransa ra tay selahîyetdarî kenê ke sereyê Qirkerdişê Parisî yê Diyînî zî bigêrê. Ganî seba cigêrayîşê nê qirkerdişî Paris de komîteyêke bêra awankerdene.

Îqtîdarê AKP-MHPyî pê polîtîkayanê şerî welat mîyanê krîzan de verda. Hînî peynîya înan ameya. Îqtîdar HDPyî sey sebebê rijîyayîşê xo vîneno coka tim hêrişê HDPyî keno. HDP xo rê çareserkerdişê meseleyan esas gêno la îqtîdar seba ke nêwazeno nê meseleyan çareser bibo keno ke verê HDPyî bigêro. Tewr peyênî hetkarîya xezîna ya seba HDPyî ameye blokekerdene. Seba ke weçînayîşan de cayê HDPyî dîyarker o, îqtîdar nêwazeno HDP weçînayîşan de ser bikewo. Nika zî îqtîdar keno ke HDPyî biqefilno. La ê se kenê wa bikerê şar tim do paştî bido HDPyî. Raşta zî tewirê HDPyî zaf rûmetên o. Ez pê bawer a ke HDP naye ra pey zî do bihêzêr bibo.

Her ke şino şerê Herêmanê Pawitişî yê Medya zor dano îqtîdarê AKP-MHPyî. Îqtîdarê AKP-MHPyî û dewleta tirke hetêkî ra pê metodanê bêexlaqan ê sey çekanê kîmyewîyan şer kenê hetêkê bînî ra zî vera şarê ma polîtîkayanê şerê taybetî anê ca. Dewleta tirke Vakur de ciwanan musnena madeyanê tîryakî, fuhuş, ajanîye û xayînîye. No şero taybet o. Dewlete kena ke cinîyî û ciwanî nasnameyê xo yê kurdayetîye ra dûrî bikewê. Ganî bi taybetî keyeyî verê nê polîtîkayan de hişyar bibê. Nê rojanê peyênan de ma eşnawit ke Wan de domana 16 serre raşta tecawuzê 40 polîsan, payeberzan û wezîfedaranê dewlete tirke ameya. Ganî sere de şarê Wanî şarê Kurdîstanî vera nê kerdişî wurzê payan ser. Ganî cinî, ciwan, doman û şarê ma vera dişmenî xo bipawê. Wa şarê kurdî xopawitişî bîyaro ca û qetî rûmetê xo ra fek vera medo.

Yeno vatene ke Sûrîye û Tirkîya pêvînayîşan kenê. Sûrîye ganî kurdan rê dişmenîye mekera. Kurdan vera DAÎŞî şer kerd û Sûrîye pawite. Tirkîya pê cerganê cîhadîstan Sûrîye mehf kerde. Eşkera yo dewleta tirke nê cergan ra fek vera nêda. Dewleta tirke armanc kena ke kurdan qetil bikera. Ganî Sûrîye nêba hempara nê polîtîkayan. Erdogan wazeno pê meseleya Sûrîye weçînayîşan de ser bikewa. Dewleta tirke wazena ke Sûrîye de kurdî bêstatu bibê. Eke kurdî bêstatu bimanê no do zerar bido Sûrîye. Erdogan mesuldarê krîzê Sûrîye yo. Ganî Sûrîye pê kayanê Erdoganî mexapîya. Eke Erdogan weçînayîşan de ser bikewo Sûrîye do zerarêkê pîlî bivîna. Kurdan heta nika Sûrîye pawite. Coka ganî Sûrîye sey dewleta tirke dişmenîya kurdan nêkera. Eke wina bikera zî Sûrîye do peynîya xo bîyara. Ez pê bawer a ke Sûrîye pê dîyalogan meseleyanê xo yê bi kurdan çareser bikera. No do yewîya Sûrîye bîyaro ca.''