Hemserekê Konseya Rayberdişî ya KCKyî Cemîl Bayikî derheqê Komployê Mîyanneteweyî yê vera Rayberê Şarê Kurdî Abdullah Ocalanî de ANFyî rê qisey kerd. Qiseykerdişê Bayikî ra qismêk wina yo:

''Komployê Mîyanneteweyî sere ra heta peynî hetê Amerîka, Yewîya Ewropa û Rusya ra ame rayraberdene. Rolê Sûrîye, Yunanistan û Tirkîya  xizmetê burokratîkî ra wetêr nêbi.  Bitaybetî tekîlîyê merkezî ê Anqara, London û Washington bibî.  Înan Misir zî girewt hetê xo. Ameyêne waştene ke Rayber Apo serê Başûrê Kurdîstanî ra bi hemkarîya PDKyî  bigêrîyo binê tecrîd û çemberî.

 Rayber Apoyî Rojhelatê Mîyanênî de 20 serrî têkoşîn kerd. Xeylêk şar, kultur, rêxistin, şexsîyet û tay temsîlkaranê dewletan de pêvînayîşê bêhûmare kerdî. Nê 20 serran de Kurdîstan û Rojhelatê Mîyanênî de averşîyayîşê tarîxî vejîyayî werte. Prosesê roşnbîyayîşî ameyêne ciwîyayene. Nê tesîrê dengeyanê sîyasetî kerdêne. Sîstemê modernîteya kapîtalîstî nê ra tersa. Înan Rayber Apo û PKK xo rê sey tehdît dîyênî. Xora rêxistinê bînî yê kurdan mîyanê sîstemê hegemonîkî de bî. Têkoşînê PKK yî rewşa ke sîstemî afernaya, xeripnayêne. Serhildanê Kurdîstanî û têkoşînê gerîlayan her roje xurtêr bîyênî. Tirkîya seba ke verê nê bîgero her çî girewtêne çim.

Ez nê vajî; ne sey partî û têgêrayîşî ma, ne  zî şar û dostê ma semedê nê komployî hazir bî. Şarê Kurdîstanî tarîx de xeylêk qirkerdiş, surgun û tradejîyî dîyî. Heme serewedaritişan de ma eşkenê nê bivînê. Tarîxê kurdan de reya verêne ka Rayberê înan yeno tepiştene la kurdî vila nêbîyî. Rixmo ke komployî 25 serrî xo dima verdayî têkoşîn hema dewam keno. Rayber Apoyî wina yew partî û wina yew şar aferna ke xeta ey de bi hewayêkê qerardar têkoşîn dewam keno. Nê çîyê verênê ke tarîxê ma de benê û zaf muhîm ê.

Roja tepiştişê Rayber Apoyî semedê kurdan senî ke roja qiyamet bo. Bermayîş, dûakerdiş, xoveşnayîş, waştişê veşnayîşê dişmenî, xurtkerdişê têkoşînî her çî têmîyan de ciwîyayêne. Şarê ma her ca de vera komployî bi yew. Wezîrê Karanê Teberî yê dewrî Madeleine Albgrithî o wext wina vatbi,  'Xora ma zanayêne kurdî vera tepiştişê Ocalanî vejîyenê la çîyo winayên qet çewî texmîn nêkerdênê.' Raşta zî vindertiş û têkoşînê şarê ma biheybet bi. Têkoşîno birumet û tarîxî yo verên zîndanan de şexsê hemra Halît Oral de bi şîarê 'Şima Nêeşkenê Tîja Ma Tarî bikerî' bi. Bi desan embazê ma bi nê şîarî bîyî bêmerg. Komployê Mîyanneteweyî kurdan de ruhê yewîya neteweyîye aferna. Paradîgmaya Rayber Apoyî bîye cewabê heme hesreta tarîxî ya şarê ma. Coka şarê kurdî vera komployî bi yew û wina wayîrê Rayber Apoyî vejîya.

Modernîteya kapîtalîstî Rayber Apo û PKK qebul nêkerdêne. Yew waştişê komlogeran  o bi ke bi nameyê kurd û Kursîtanî xeta PDKyî vejîyo vernî. Yew amancê komplo zî o bi ke şarê kurd û tirkî biverdîyê yewbînan. Înan vatêne qey bi teslîmgirewtişê Rayber Apoyî, PKK vila beno. Raşt a zî komployî zaf zor da partî, şar û dostanê ma. Bi hamleya tarîxkî ya Rayber Apoyî ke sey 'rojbîyayîşê min o hîrêyin' pênas keno, komplo bi zafî ame betalkerdene. Komplo ame betalkerdene. PKK tesfîye nêbi, heta bi xurtbîyayîşî têkoşînê xo domeneno û warê mîyanneteweyî de zafêr yeno qebulkerdene. PDK hetê kurdan ra ame teşhîrkerdene.Planê dişmenkerdişê şaranê kurdî tirkî ame betalkerdene. Cinîya azada ke hetê Rayber Apoyî ra ameye afernayene, têkoşînê ci yê vera çete û faşîstan xora dinya ra vila bîyo.

Bêşik Komployê Mîyanneteweyî bi zafî ame betalkerdene la çi heyf ke Rayber Apo hema Îmrali de yeno tepiştene. Komlo senî ke ame plankerdene wina ser nêkewt la dewam keno. Komplo ewro sey tecrîdî dewam keno. Ganî hinî Rayber Apo bi qetî bêro azadkerdene. Rayber Apo semedê têgêrayîş û şarê xo senî erjîyaye yo hetê her kesî ra yeno zanayene. Têna yew vateyê ey senî tesîrê ma keno, ma şa keno no zî yeno zanayene. Coka îqtîdaro faşîst ê AKP-MHPyî keno ke Rayber Apoyî şar û partîya ma ra raqilno. Bêşik no metodêko xirab ê komplo şerê taybetî yo.

Ma sey têgêrayîşê têkoşînê tewr zehmet û biheybet ê heme wextan danê. Dewleta tirke bi paştîdayîşê Amerîka û NATOyî bi heme hêzê xo bi tewirêkê bêehleqî yena ma ser. Vera Gerîlayanê Azadîye yê Kurdîstanî rojane bi desan rey gazê jehrin û çekê kîmyewî yenê şuxulnayene.  No şero ke sey metodê şerê taybetî vera gerîlayan yeno kerdene, hêzê mîyanneteweyî her qeyde paştî danê ci. Şuxulnayîşê çekanê kîmyewîyan nêvînayîşî ra yenê û bi dewleta tirke hemkarîye yena kerdene. No zî bi tewirêkê bînî dewamê komployî yo.

Bi qala kilme Rayber Apo, PKK û şarê kurdî pabesteyê yewbînan ê. Azadîya fîzîkîye ya Raybar Apoyî yena manaya vergirewtişê qirkerdişanê sîyasîyan. HDPyî nizdê 7 mîlyonî reyî girewtî, 80 ra zafêr şaredarîyê ci est ê. Heme şarîdarîyan de qeyûm ame cakerdene, heme vîjnayoxê ci ameyî tepiştene, bi seyan îdarekar û endamê partîya ci ameyî cezakerdene û teberê sîyasetî de ameyî verdayene. No zî nimûneyêka  eşkera ya dewamkerdişê komployî yo. No têkoşîn do heta azadkerdişê Rayber Apoyî û statuyê azadî yê şarê ma do dewam bikero. PKKyî ra nêbîyênî ne Şingal bîyênî azad û ne zî Şorişê Rojawanî biyênî. Xeta azade ya Rayber Apoyî do qetî ser bikewo. Şarê ma do ser bikewo û heme komplogerî bin bikewê.''