Hemserekê Konseya Rayberdişî ya KCKyî Cemîl Bayikî bi meymanê bernameyêkê taybetî yê Stêrk TVyî û rojdem ercna.

Bayîkî ard ziwan ke şero girdo ke Rojhelatê Mîyanênî de ciwîyanê semedê kurdan hem frisendêk hem tehlukeyo pîl o û vat: ''Eke kurdî nê firsetî bişuxulnê do bibê wayîrê statuyî. La eke kurdî hemleyêke mekerê no firsend remen.''

Bayîkî vat: ''Rayberîye heme cuya xo semedê şarê kurdî û merdimîye da. Eke ewro şarê kurdî semedê azadîye payan ser o û têkoşîn keno, şarê kurdî dinya de yeno naskerdene, kurdî hurmet vînenî û yenê heskerdene no xeyrê têkoşînê Rayber Apoyî yo. Coka têkoşîno ke Rayber Apoyî aver berd zaf muhîm o û nê semedî ra her kes ey rê deyndar o ke ganî nê deynê xo bido. Rayber Apo têna rayberê şarê kurdî nê Rayberîya heme Rojhelatê Mîyanênî û merdimîye keno. Meseleyanê înan sey ê xo vîneno û ci rê rayîrê çareserîye vîneno. Meseleya kurdî û Rayber Apo kewtî tê zere. Azadîya Rayber Apoyî azadîya kurdan a. Azadîya şarê kurdî azadîya Rayber Apoyî ya. Tarîxî ra nata eke rayberêk esîr o û binê îşkenceyî de yo şarê ê rayberî zî esîr gerîyeno û îşkence vîneno. Raştîye na ya. Heta ke rayberê ê şarî azad nêbo, şar zî azad nêbeno. Coka azadîye Rayber Apoyî azadîya şarî ya.

CPT netîceya têkoşînê şarê ma de mecbur mend ke vajo vera Rayber Apoyî tecrîd esto. Eke şarê ma têkoşîn mekerdayêne CPT no qebul nêkerdêne. Têkoşînê şarê ma û ê ma  rîyo raşt ê AKP-MHPyî veto werte. Dostê kurdanê ke azadîye û demokrasîyî pawenê zî vanê hînî wextê azadîya Rayber Apoyî ameyo. Wextê azadîya Rayber Apoyî ame, ravêreno zî. Aye ra ganî prosesê verê ma de  Rayber Apo azad bo. Êyê ke azadîya Rayber Apoyî esas genê û semedê naye gureyenê, ez înan selam kena û hurmetanê xo teqdîm kena.

Xeylêk wexto dezgehanê ma û embazan kombîyayîşî kerdêne. Netîceya nê kombîyayîşan de ma qerarê hemle girewt. Rojhelatê Mîyanênî de şerêko çetin esto ke dengeyî newe ra yenê ronayene. Coka her kes semedê serkewtişê xo hemle ser hemle keno. Kurdîstan de, warê ereban de reyna mabenê ereban  Îsaraîlî de, Iraq, Sûrîye û Îran de xeylêk problemî ciwîyenê. Nê têna problemê leşkerî nê komelkî, rêxistinkî û kulturkî xeylêk problemî estî. Seba ke Şerê Dinya yo 3. Kurdîstan de ciwîyeno kurdî probleman ciwîyenê. Merkezê nê şerî Kurdîstan o û qederê kurdan û Rojhelatê Mîyanênî pabesteyê nê şerî yo. No şer do heme dinya ser o tesîr bikero.

Dewleta tirke dîye ke nê şerî denge û statuyê verênî xeripnayî û kurdî her kesî ra zafêr eşkenê tira feyde bivînî coka seba ke kurdî feyde nêvîne destê ci ra çi yeno kena. No şer semedê Tirkîya zî tehluke yo. Kurdî hînî kurdê verêne nîyê, rêxistinkerde wayîrê xo vejîyenê û têkoşîn kenê. Bano ke nê şerî de bibê wayîrê statuyî. Xora no semedê Tirkîya merg o.

Ma heta ewro xeylêk hemleyî kerdî û nînan ra netîce zî girewt. La ê hemleyê ma zafêr semedê averberdişê têgêrayîşî bî û perçeyêk de ameyêne rayraberdene. La hemleya newî ê bînan ra cîya ya. Ferqê naye oyo ke ma wazenê têkoşînê xo biresnê amancê ci. Şerêko gird esto ke do denge û statuyê neweyî bibê. Kurdî zî ganî qezancanê xo esas bigerê. Semedê kurdan tarîxî ra  wina firsandî çînêbî. Dengeyê îmha û înkarî bîyî vila. No her kesî ra zafêr kurdan rê feyde keno. Eke kurdî nê firsendî bişuxulnê her kesî ra zafêr do netîce bigerê. Xora no her kesî ra zêdêr heqê kurdan o. Kurdan bi têkoşînî xo no heq kerd. Nika her kes kurdan ra hevîdar o. Têgêrayîşê kurdan sey şansêk yeno vînayene. Ma zî nê semedî ra na hamle da destpêkerdene. Eke hamle aver şire şarê kurdî û şarê bînî do qezenc bikerê.

Bitaybetî têkoşînê kurdan ê vera DAÎŞî dinya de tesîr kerd. Rolo ke NATO û Tirkîya bi serran o kurdan rê fasilnayo rijîya, polîtîkaya qerkerdişî ya înan binkewt. Kurdî hînî yenê heskerdene û sey hevî yenê dîyene. Na rewşe semedê kurdan zî bi hêzêko pîl.

Problemê kurdan oyo ke nêbîye yew. Xora dişmen zî naye vera kurdan şuxulneno. Eke kurdî bibê yew û îmkananê xo pîya bişuxulnê benê hêzêko pîl. O wext qet çew nêeşkeno vera îna vindero. Rewşa winayên de dewleta tirke û dewlete bînî nêeşkenê vera înan polîtîkaya îşxalî raya berê. Seba ke sîyasetê kurdan de yewîye çîn a nê hêrişê îşxalî yenê kerdene. Mabenê şarî de yewîya neteweyîye esta.

Tay kurdî estê dişmenî dir hemkarîye kenê. Her hetî ra paştî danê înan û tim înan wasifenê. Sîyasetê Tirkîya eşkera yo. Vera Vakur, Başûr û Rojawanî qirkerdişê kurdan aver benê. Sîysetê dewleta tirke Îşxal, qetlîam, bedilnayîşê demografîyî, asîmîlasyon, bi nameyê kurd û Kurdîstanî çînkerdişê her çîyî, tepiştiş, destbenkerdiş, hêrişê vera goristanî, vêşnayîşê daristanan, bombakerdişê koyan, barkerdişê şarî, fuhuş, eroîn û vilakerdişê ajanîye yo. PKK bedalanê pîlan zî bido vera polîtîkaya qirkedişî ya Tirkîya vindeno. Têkoşînê PKKyî têna semedê Vakurî nê semedê Rojawan û Başûr o. Têna semedê şarê kurdî nê semedê Rojhelatê Mîyanênî û merdimîye yo.

PDKyo ke  sîyasetê meşrukerdişê îşxalê dewleta tirke rayra beno, tim vano ke 'sebebê hêrişê Tirkîya yê vera Vakur, Rojawan û Başûr PKK yo.' PDK herinda Tirkîya de PKKyî sûcdar keno. Êyê ke Tirkîya sey sûcdarî nêvînenî, heq danê ci hêrişê ci meşru vînenê. Hêrişê îşxal û qikerdişî meşru vînenî. Kurdî nayî qebul nêkenê. Xora PKK vera nê sîyasîte vindeno û têkoşîn keno.

Gerîla sere de Vakur, Heftanîn û Xakurkê de her ca de qeyremanîye keno. Şertanê zehmetan de destanan nuseno. Gerîla 40 serrî yo ke vera polîtîkaya qirkerdişî têkoşîn keno û bedelanê pîlan dano. Xeyrê têkoşînê gerîlayan kurdî erwro estê. Her kes gerîlayan rê deyndar o. Gerîla hêzê pawitişê şarê kurdî yo. Gerîlayî şarê kurdî hewnê mergî aye kerd. Tîya keda Rayber Apoyî zaf a la no pê gerîlayan kerd.

PKK seba ke têgêrayîşê azadîye yo serkeşîya cinî û ciwanan esas girewt. Têgêrayîşê ma ciwan dest pêkerd dû ciwan dewam bikero. Ciwanî ganî her ca de semedê averberdişê hemle têbigerê. Na hemle têna ê kurdan nîya, hemleya şaranê Tirkîya ya zî, hemlaya hêzanê azadîye û demokrasîyî ya. Na hamle têna ê HPG, cinîyan û ciwanan nê ya HBDH ya zî. Coka ganî her kes hemle de ca bîgero. Ez bawer kena ke Ewopa zî hemle esas gena. Vengdayîşê mi yê şaranê Rojhelatê Mîyanênî û dostan rê oyo ke wa bihêz na hemle de ca bigerê. Nê esasan  ser o ez her kesî rê serkewtiş wazena.''