Hemserekê Konseya Rayberdişî ya KCKyî Cemîl Bayikî seba şayîya Newroze ya Frankfurtî mesajê bi vîdeoyî şawit û venga şarî da.

Mesajê Newroze yê Bayikî bi kilmî wina yo: 

''Ez Newroza Rayber Apoyî û her kesî fîraz kena û her kesî rê serkewtiş wazena. Seke zanîyeno Rayber Apoyî bingeyê PKKyî Newroza 1973î de eştbi. PKKyî nê esasî ser o Rayberîye înşa kerd û no tarîx û roja ewroyîne yew kerdî. Coka Rayberîye, partîye û şarêko pîl vejîya meydan û rixmê pêro şertan zî têkoşînê xo rê dewam kerd.

Rayber Apo nika binê wehşetêkê pîlî de yo ke ruhê Newroze qetî ney qebul nêkeno. Coka şarê ma wa bi wesîleya Newroze nêzdîyê Rayber Apoyî bibo, nê wehşetî qebul nêkero. Ganî na Newroze biba destpêkerdişê azadkerdişê Rayber Apoyî. Şarê kurdî ra no yeno waştene, têna wina ma eşkenê deynê xo bidê Rayber Apoyî. PKKyî zî seba ke şarê kurdî pawit gêrîya lîsteya terorî. Seba ke Rayber Apo azad bibo û PKK na lîste ra bêro vetene ganî şarê ma bixebito, têkoşîn bikero. No erkêko tarîxî yo û do netîceyanê pîlan vejo werte.

Eke Rayber Apo azad bibo û PKK na lîste ra bêro vetene AKP û MHP birijê, Tirkîya demokratîk biba, Kurdîstan zî azad bibo. Mam Reşo, Zendûra, Werxelê ûsn de ma şehîdê pîlî dayî. Nê şehîdan têna seba Vakurî nê seba pêro Kurdîstanî têkoşîn kerdêne. Dewleta tirke û PDK amadekarîya hêrişanê neweyan kenê. PDK hetê dewleta tirke de cagêno. Şarê kurdî wa pê na raştîye biheso û goreyê ci têbigêro. Kurdî binê îşxalî de yê û ancax pê xoverdayîşî eşkenê xo bipawê. PDKyî reyde yewîya neteweyîye nêbena.

Wayîrvejîyayîşê Newroze wayîrvejîyayîşê şehîdan o; Newroze xo newe ra afernayîş o. Kurdî ganî vera hêrişanê dişmenî xo newe ra bi ruhê Newroze biafernê. O çax kurdî eşkenê azad bibê.

Cinîyê kurdî serkêşîya azadîye, demokrasî û komelê kurdan kenê. Cinîyî kurdî xeta Rayber Apoyî de şinê. Bi na wesîle ez înan fîraz kena. Ciwanê kurdî zî seba merdimîye û şarê kurdî bi fedakarî têkoşîn kenê û her ca de wezîfeyê xo anê ca. Ez înan zî bi hûrmetî selam kena. Ma do Hewteyê Çêrîye de têkoşînê xo hîna berz bikerê. Ma seba 2022yî hedef kerd ke Rayber Apoyî azad bikerê, PKK lîsteya terorî ra bivejê. Çarçewa nê bernameyî de ma do têkoşînê xo rê dewam bikerê. Nê esasî ser o ma Newroza şima fîraz kenê û her kesî rê serkewtiş wazenê. Biciwîyo Serek Apo, Biciwîya Newroze.''