Hemserekê Konseya Rayberdişî ya KCKyî Cemîl Bayikî Bernameyê Taybetî yê Stêrk TVyî de beşê yewînî de rojdemê  Rojhelatê Mîyanênî û Rojawanî ercnaybî. Bayikî beşê diyînî de zî derheqê Vakur û Başûrî de qisey kerd.

Ercnayîşê Cemîl Bayikî wina yê:

"Dewleta tirke dî ke waştişê azadîye yê kurdan her ke şono beno zêde. Naye ra waşt ke 'Planê Çinkerdişî' bîyara ca. No plan dewamê plananê verênan ê vera kurdan o. Çunke ronayîşê komare de zî vera kurdan planê Şark Islahat kerdibi. Esasê nê planî çinkerdişê kurdan û Kurdîstan o.Têgêrayîşê kurdan her ke şi bi xurt. Dostê ci her cayê dinya de bîyî zêde. Mesela kurdan hînî meselêka mîyanneteweyî ya û çareserîya ci zî hînî zaf rojdem de ya. Coka Tirkîya se kena wa bika nêeşkena netîce bigêra. Seba ke netîce bigêra dewleta tirke teda û zulmê xo kena zêde la reyna zî a do bin bikewa.

Dewleta tirke ya îşxalkere têna vera PKK û şarê Vakurî nîya. Tirkîya dişmena pêro kurdan a. Dewleta tirke dişmenîya her keso ke seba kurdan, heqanê kurdan têgêreno kena. La vana ez vera kurdan ney vera PKKyî ya. Vana PKK temsîlkarê kurdan nîyo. La zûr kena. Ê şerê psîkolojîkî kenê.

Her roje bi desan kesî yenê tepiştene, şaredarîyê kurdan yenê xespkerdene. Her cayê Vakurî de îşkence esto. Dezgehê kurdan yenê çinkerdene. Çîyê ke kurdan û Kurdîstanî nîşan danê yenê çinkerdene. Merdimî bi zorî yenê koçkerdene. Polîtîkayê asîmîlasyonî û qirkerdişî yenê xebitnayene. La Hukmatê Başûrî vera nînan bêveng o. Tirkîya Rojawan îşxal kerd, destkewteyê kurdan çin kerdî, demografîyê kurdan vurnena vera nînan zî Başûr çîyêk nêkeno. Şarê Başûrî tehlûkeyê Tirkîya hîna baş vîneno, malanê Tirkîya boykot keno. No bira boykotî birêka raşte û baş a. Çunke bi hêrînayîşê malanê tirkan ekonomîyê tirkan yeno xurtkerdene.

MÎT Başûr de o rêxistin keno û wazeno kurdan çin biko. Her roje MÎT keye û kadroyanê bingeyînan ê PKKyî qetil keno. Têna nêeşkeno nê qetilkerdişanê xo Herêmanê Pawitişî yê Medya de biko. Silêmanî de zî zaf kesan qetil keno. Têna endamanê PKKyî ney, şarê ercayeyî yê Başûrî zî qetil keno. MÎT şarê Başûrî keno ajan. Ganî şarê Başûrî ney bivîno.

Wexto ke Vakur de xoverdayîş çinêbo ê cayanê bînan de zî xoverdayîş nêbeno. Eke nika perçeyanê bînan de tay destkewteyî estê no sayê xoverdayîşê Vakurî ra yo. Vakur esas o. Dişmena esase ya Vakurî Tirkîya ya. Xoverdayîşê Vakurî mîyanê şarî de ruhêk awan keno, şarê kurdî aver beno. Coka şarê kurdî ganî têkoşînê Vakurî pîl biko.Îşalkerê kenê ke kurdan û Kurdîstan çin bikê. Ganî şarê ma dezgehanê dewlete ra xo dûrî bivisno. Xizmetê nê dezgehan nêkero, seba ke xo rêxistin biko ganî têkoşîn biko. Dostê şarê kurdan zî ganî paştî bidê kurdan. Malanê tirkan megêrê, meşorê Tirkîya. Nê faşîzmê dewleta tirke çin bikê.

Senî ke serra 2019î zaf zehmet bîye, serra 2020î zî do zehmet biba. Na yew rastî ya. Çunke Tirkîya de faşîzm her ke şono beno zêde. Coka şarê kurdî û hêzê sosyalîstî têkoşînê xo yê vera faşîzmî ganî xurt bikê. Eke wina nêbo nêeşkenê bibê îqtîdar. Ma têkoşîn kerd, bedelî dayî, raştîyî mojnayî dinya û Tirkîya, ma ê teşhîr kerdî, qels kerd, tay mend ke ma înan çin bikê. Naye ra ganî ma nê karê o temam bikerê. Coka ganî ma serra 2020î de têkoşînê xo xurtêr bikerê, vila bikê. Her kes ganî têkoşînê o yê faşîzmî pîl bikero.

Kurdî zî ganî yew bibê. Ganî kurdî yewîya neteweyîye û kongreya neteweyîye xurt bikê. Ganî kurdî îtîfaqê o yê bi hêzanê domakratîkan, têgêrayîşanê sosyalîstan bihêz bikê. Bi nê hawayî ma do vera faşîzmî vinderê û wayîrê Rayber Apoyî bivejîyê. Çunke Rayber Apo têna rayberîya kurdan nêkeno. O rayberîya merdimîye, demokrasîyî û pêro şaran keno.

Têna ma wina nêvanê. Kesê ke raştîya rayberîye fam kerde û o xo rê kerd rayberêk zî wina vanê. Nika Rayberîye ser o tecrîd esto. Rayberîya şarî sey binge nêna girewtene. No zî tecrîd hîna xorin keno. Coka şarê kurdî, hêzê demokrasîyî, sosyalîstî û azadîye hîna zaf wayîrê Rayber Apoyî bivejîyê û tecrîd bişiknê. Eke tecrîd biqedo sîyasetê vera kurdan zî qedîyeno. Faşîzm çin beno. Şar zî faşîzm ra xelisîyeno. Naye ra serra newîye de têkoşînê ma do hîna pîl bibo.

Ganî kesêk têkoşîn ca nêverdo û teslîmîyet nêweçîno. Çunke yew karakterê Şorişê Kurdîstanî esto. O çi yo? Çarekerdişê bêmumkînîye yo. Şarê ma ganî rayîrê rehetî û asanî nêweçîno. Ganî wayîrê xo, erjanê xo bivejîyo. Vera tedayan, zulman vindero ke têkoşîn pîl bibo, faşîzm çin bibo. Bi nê hîsan ez serra newîye ya şarê kurdan, dostanê kurdan û pêro merdimîye fîraz kena. Serkewtiş.‘‘