Hemserekê Konseya Caardişî ya KCKyî Cemîl Bayikî Vakur û Rojhelatê Sûrîye de îşxalkerîya Dewleta Tirkan sey kewtişê mîyanê bîrê xorînî nîşan kerde û vat: "Bi îhtîmalêkê pîlî Tirkîya do derbêka pîle biwera."
Hemserekê Konseya Caardişî ya KCKyî Cemîl Bayikî beşdarê bernameyê taybet ê Stêrk Tvyî bi û cewab da persanê rojnameger Ciwan Tunçî.
Çend babetê ke Bayikî erjnayî wina yê:
"Rojawanê Kurdîstanî de xoverdayîşê rûmetî esto. Nê xoverdayîşî de şarê çêrî, şerwanê fedayîyî vera Dewleta Tirkan a îşxalkere xoverdayîşêkê bêhempayî danê. Ez selam kena şarê ma û şerwananê ke vera îşxalan têkoşîn kenê, hûrmetê xo seba nînan pare kena. Pêro şehîdan yad kena."
"Rojhelatê Mîyanênî de têkoşîn û şerêko pîl esto. Zaf vurnayîşî ameyî meydan û do bêrê. Dewleta Tirkan seba pêro herême û hêzanê demokratîkan dişmena esas a. Naye ra ganî hem kurdî hem zî tirkî na rastîye baş fam bikê û vera îşxalkeran pîya têkoşîn bikê. Na raye eşkenê netîce bivurnê. Şarê herême ganî hêzanê xo biko yew."
"Armancê Tirkîya çi yo? Ê yewîn wazena ke kurdan qir bika û ê dîyin zî wazena ke demokrasî birijna. Sîyaseto ke Tirkîya nika teberê welatî de kena dewamê sîyasetê vera demokrasîyî yo. Coka wazena Sûrîye de kurdan qir bika û sîstemê demokratîk çin bika. Seba xo vana 'Mi seba Sûrîye hêzêko mîllî awan kerd.' Yanî vera Sûrîye artêşêke awan kerde."
"Tirkîya vana ez serkewte ya, wina propaganda kena. Na çendek rast a kişf nîya. Tirkîya kewte bîrê xorînî. Nika hem Amerîka hem zî Rûsya seba armancanê xo aye xebitnena. Tirkîya dişmenîya kurdan kena. DAÎŞ û cerganê sey ey xebitnena. Gore qanûnanê mîyanneteweyîyan nêkewte Vakurê Sûrîye, eqsê ci zûr o. Xora kes wina qebul nêkeno. Kesêk paşta Tirkîya nêgeno, nêbeno wayîrê ci. Dewletê ke Tirkîya reyde îtîfaq kenê nêeşkenê na rewşe şarê xo rê îzah bikê. Tirkîya hem dişmenîya kurdan kena hem zî kewte mîyanê Rûsya û Amerîka û senî mîyanî ra vejîyena kifş nîyo. Îhtîmalêko pîl Tirkîya do derbêka pîle biwera.."
