Hemserekê Konseya Rayberdişî ya KCK’yî Cemîl Bayikî Hukmatê Iraqî, serdestîya Başûrê Kurdistanî û partîyê sîyasî hîşyar kerdî ke seba qirkerdişê Kurdan Erdogan-Bahçelî reyde hemkarîye nêkerê. Bayik beşdarê bernameyê Rojeva Welatî yê Stêrk TV’yî bi û cewab da persanê rojnameger Enes Yildizî.

Grevê vêşanîye vera faşîzmî û tecrîdî yê

Bayikî ard ziman ke grevê vêşanîye yê ke rayberîya Leyla Guvene de vera tecrîdkerdişê Rayberê Şarê Kurdî Abdullah Ocalînî yenê kerdene ‘tarîxkî’ yê û vat, “Na çalakîye vera tecrîd û faşîzmî ameye destpêkerdene. Eke tecrîd û faşîzm bêrê şikitene, verê demokratîkbîyayîşî do abibo. Verê şarê Kurdî de, rûmetanê merdimîye de, azadîye û demokrasî de xeterêk esto. Eke xeter gird nêbîyêne kesêkî bedenê xo nîya nêhelinayêne. Her ke şino bedenê xoverdayoxanê grevê vêşanîye helîyeno.”

 Vera dayîkan hêrişkerdiş, vera cuye hêrişkerdiş o

Bayikî bale ante serê xoverdayîşê dayîkan ê seba grevê vêşanîye û vat, “Bi rastî, bi mojnayîşê nimûneyê cesaret û qehremanîye vera nê sîyasetî vindenê. Vera dayîkan hêrişkerdiş, vera merdimîye yo, vera cuye hêrişkerdiş o. Kesê ke xo ra vanê Kurd, welatperwer, sosyalîst ganî na rewşe qebûl nêkerê û şarê Kurdî û ciwanê Kurdî ganî hesabê nê hêrişan bipersê. Ganî hesab bêro persayene”.

Kam ke paştdayîş bidero Erdogan-Bahçelî faşîzmî rê xizmet keno

Bayîkî vat, “Ez bi hawayêko eşkera vana; Tirkîya de yan zî teberê Tirkîya de kam ke paştdayîş bidero Erdogan-Bahçelî faşîzmî rê xizmet keno, qetilkerdiş şarê Kurdî  rê xizmet keno. Benê hemkarî nînan. Rîyê rejîmê AKP’yî eşkera werte de yo.”

Eke PKK derbe bigêro kesêk nêeşkeno payra  bimano

Bayikî bale ante serê serdana Wezîrê Karanê Teberî yê Tirkî Mevlut Çavûşogluyî ya Bexda û Hewlêrî û ard ziwan ke, ê xo mîyan de hesabanê qilêrinan kenê û nê hesabî newe nîyê û seba kesanê ke wazenê PKK bibo zehîf û derbe bigêro zî vat, “Eke PKK derbe bigêro tewr kesêk nêeşkeno payra vindero. Eke PKK derbe bigêro, o wext yeno a mana ke şarê Kurdî zî derbe girewta. PKK’yî ser o xo danê cuyayene. Bi destanê xo erjîj nêdê linganê xo ro. Karê înan tasfîyekerdişê PKK û şarê Kurdî ra derbaz nêbenê.”

Hewlêr seba hêrişanê hewayî paşt dano dewleta Tirkî

Bayikî vist vîrî ke hêriş û firnayîşê keşîfî bitaybatî stargehanê Tirkîya yê Başûrê Kurdistanî ra yenê organîzekerdene û va,’’Wesayîtê bisileh û bêmerdimî yê hewayî (ÎHA) heta Qendîlî yenê. Her kes zano ke nê wesayîtî Başûr ra wirzenê. Eke Başûr paştî înan medo heta Qendîlî nêeşkenê berê. Wazenê ke mîlîtananê PKK’yî qetil bikerê. Eke Tirkîya nê wesayîtan wina şuxelnena, ê ke naye rê xizmet kenê berpirsîyarîya înan zî esta.’’

Sînoran de DAÎŞ’ijî yenê cakerdene

Bayikî derheqê îşxalkerdişê Rojawanî de zî ard ziwan ke 'Herêma Tampone' ya dewleta Tirkî pawena, yena manaya herême ra vetişê Kurdan û vat, “Nêwazanê Kurdî hetê Sûrîye de bimanê û wazenê ke cayê ke şarê Kurdî ciwîyeno, Ereban tede bîyarê cakerdene. Wazenê eynî polîtîka sînoranê Vakurê Kurdistanî de zî bîyarê ca. Bitaybetî weçînayîşê cayîyan de Eruh, Şirnex, Elkê, Bêşebap, Şemzînan, Esendere de bi hêzê eskerî ameyî girewtene ke wazenê nê cayan de çeteyanê DAÎŞ’î  bîyarê cakerdene. Riha de qezayê ke cayê şarê ma girewtî, dest ra girewtî. Nê zî girêdayîyê nê planî yê. Ganî şarê ma bivîno ke planê qirkerdişî yenê rayraberdene.”