Endamê Konseya Rayberdişî ya KCKyî Cemîl Bayik emşo do bibo meymanê bernameyêkê Stêrk TVyî. Bayikî bername de xeylêk rojdemî ercnayî.

Bayikî beşêk de îfade kerd ke ê ne vera PDKyî ne zî vera statuyê Başûrî yê û ê wazenê vera dişmenanê kurdan PDKyî reyde têbigêrê.

Bayikî da zanayene ke seba ke destê kurdan de firsendêko tarîxî esto ganî ê nê firsendî nêdê û wina venga PDKyî da: ''Ma nameyê têgêrayîşî ser o soz danê pêro kurdan û dinya ke ma  statuyê Başûrî, hukmatê Başûrî û pêşmergeyan qebul kenê. Nînan reyde qet yew meseleya ma çin a.

Ma PDKyî ra wazenê ke wa soz bido ke ajanîya Tirkîya nêkero, xizmetê sîyasetê qirkerdişî nêkero. Ganî no zî sozê înan bibo. Eke ê soz bidê o çax nê meseleyî bi rehetî çareser benê. Ma şarê xo ra zî wazenê ke wa na babete ser o vindero.

Ez na babete de wazena çîyê bînî zî vaja: qet yew kes nêeşkeno verê têgêrayîş û têkoşînî de vindero. Ganî çew ma ra nêvajo 'têkoşînî ra fek vera bidê û xo ver medê.' No têgêrayîş vera teslîmîyet û îxanetî vejîya û heta peyêne do têkoşîn bikero. Têgêrayîşê ma heta azadîya kurdan têkoşînî ra do fek vera nêdo.''

Temamîya ercnayîşê Bayikî emşo goreyê saeta Ewropa saete 18.00 de Stêrk Tvyî de do biweşanîyo.