Fermandara Qerargehê Merkezî ya YJA-Starî Bêrîtane Dersim bernameyêkê Stêrkî TVyî de qisey kerd û hêrişê îşxalî yê dewleta tirke,  nê hêrişan de rolê PDKyî û xoverdayîşê gerîlayanê HPG û YJA-Starî ercnayî. 

Qiseykerdişê Bêrîtane Dêrsim ra beşêk wina yo:

''Dewleta tirke PDKyî ra hêz gêna û vera ma şer kena. PDK zî pê zûran şar xapîneno û wazeno ke dewleta tirke vera ma şer bikero. PDK verê îşxalê dewleta tirke akerno û nêrverdeno ke şar bi hawayêkê azadî erdê xo ser de ronişo. Dewleta tirke bi 30 kîlometreyan dekewta erdê Başûrî la Mesûd, Nêçirvan, Mesrûr Barzanî vengê xo nêkenê.

Gerîlayan Kerkûk, Mexmûr û Şingal de şarê Başûrî pawitî. Gerîlayê HPGû YJA-Starî nika zî vanê ê hêzê pawitişê şarî yê û eke hewce bibo şinê çar parçeyanê Kurdîstanî zî. Înan Şingal nêpawit. Nika zî bi peymana gemarine Şingal teslîmê mesuldaranê fermanî kenê. Bêgûman şarê Şingalî do qet naye qebul nêkero.

Dengizê Reşî ra heta Amanosî, Şaho ra heta her cayê Kurdîstanî gerîlayî estê. Kurdîstan pawîyeno. Şarê Kurdîstanî hînî wayîrê hêzê xo yê pawitişî yo. Eke cergî yan zî îşxalkerî hêriş bikerê ganî şarê ma xo bipawo. Gerîlayê ma zî do heta peyêne serkêşîya şarî bikerê. Wa şarê ma yê Başûrî zî erdê xo nêdo îşxalkeran. Ma do rayberîya na hemle bikerê.

Serek Apoyî estbîyayîşê şarê kurdî îsbat kerd, seba azadîya şarê kurdî têkoşîn kerd, xo feda kerd. Êyê ke xo rê vanê rayberê kurdan çita feda kenê? Naye ra tecrîdê Îmraliyî şermêko pîl o.Ganî gerîla, şar, dostî pîya Rayberîye zîndanî ra vejê. Sey şarê kurdî ma şermê esîrîya Rayber Apoyî qebul nêkenê. Rayîrê azadîya şarê kurdî rayîrê azadîya Abdullah Ocalanî yo. 

Her kes verê îşxalan wurzeno payan ser la PDK vano 'SEba ke PDK tîya de yo.'PKK to û şarê xo paweno. Ma Kurdîstan de erdê xo ser de ciwîyenê. Vanê 'Wa şorê parçeyê xo yê Vakurî.' Ma Kurdîstan sey parçe nêvînenê. Ma seba şarê Başûrî zî fedayî yê. Gerîlayan no îsbat kerd.

Nika zî ma erdê Başûrî pawenê, ma hukmatê Başûrî pawenê. Ê seba menfaatanê xo sîyasetê gemarinî kenê. Wa şarê Başûrî nêbo çeka sîyasetê gemarinî. Wextê referandumî de tewr zaf dewleta tirke vera Başûrî vinderte.Ê nê pêro çîyan zanenê la hesabê înan rê nêno. Coka na raştîyan înkar kenê.La şar xo vîrî ra nêkeno û hînî nêxapîyeno.

Gerîlayî garantîya azadîya şarê kurdî yê. Vizêr zî wina bi, nika zî wina yo û siba zî do wina bibo. Wa çew PKK û gerîla ser o hesabêkê şaşî nêkero. Eke wina bibo nê kesî do lapatêkê pîlî biwarê û hînî qet nêrê xo ser. Ma Kurdîstan îşxalkeran rê nêverdenê. Ma ra yew/e zî bimano/a Kurdîstan do nêbo ê îşxalkeran. Bi taybetî Erdoganî rê nêmano. Wa çew xo peyê teyarayanê şerî de germ nêkero. Şar bi xo gerîla yo, ma artêşêka şarî yê. Artêşa HPGyî domanê nê şarî yê.

Birêxistinkerdişê xopawitişî wezîfeyê ma yo. Ganî ma destûr nêdê ke ajanêk bikewo ma mîyan.''