Endamê KNKyî, Hemserekê Cepheyê Şarî yê Demokratîkî û Akademîsyenê Zanîngehê Dihokî Kamûran Berwarîyî zîyaretê Serekwezîrê Iraqî Mustafa El Kazimîyî yê Tirkîya ercna.

Berwarîyî pare kerd ke sebebê zîyaretê El Kazimîyî waştişê madî û manewî bi û vat: ''Rewşa ekonomîke ya Iraqî hol nîya coka Iraq welatanê bînan ra paştdayîş wazeno. Nê pêvînayîşî de îdareyê Şingalî, PKK, meseleya awe, akerdişê beran ê neweyan, têkilîya Rojawan û Başûrê Kurdîstanî ameyî ercnayene. Netîceya pêvînayîşî de do çîyêko baş nêbo. Tirkîya wazena Iraq bişuxilna. ''

Walîyê Dihokî Elî Tetarî Kampa Multecîyan a Mexmûrî ser o qiseykerdi. Berwarîyî no vist vîrî û vat: ''Beno ke Serekkomarê Tirkîya Walîyê Dihokî ra waşt ke sey Şingal hema rewşe bîyaro Kampa Mexmûrî ser. Çunke Kampa Mexmûrî hertim tewrê plananê Tirkîya û Iraqî yê vera kurd û Kurdîstanî ame kerdene.''

Berwarîyî ard ziwan ke no pêvînayîş kurdan rê fayde nêkeno, seba PDKyî do bibo mesele. Berwarîyî vat: ''Dewleta tirke wazena Başûrê Kurdîstanî îşxal bikera. Ganî îdareyê Başûrê Kurdîstanî vera ney tewirê xo bimojno. Nêbo pêro destkewteyî do destî ra şorê û çarenûsê kurd û Kurdîstanî do bikewo destê dewlet û hêzan.''