Qerarê ke Başûrê Kurdîstanî vera herêma Berwarî û qezaya Kanî Masî girewtî rojanê peyênan de hîna zelal benê. Hêzê PDKyî nê rojan de 3 nuqtayê kontorolî yê neweyî nayî ro û hêzê neweyî sewqê herême kerdî. PDKyî pê nê zî qîm nêkerd tewr peynî de verê şarî geno, nêverdeno şirê cayo ke tede ciwîyenê.

Goreyê çimeyanê cayîyan hêzê PDKyî heme wesayîtanê sîvîlan kontrol kenê û wexto derg danê pawitene. Reyna PDKyo ke destur nêdano ke şar şiro hêgayanê xo yê ramiteyan, herêma Berwarî û qezaya Kanî Masî de 7ê şanî ra heta 7ê sibayî tebervejîyayîş qedexe kerdo. Şarê herême ard ziwan nê saetanê ke qala ci yena kerdene de teyarayê keşîfî yê dewleta tirke gêrenê û îfade kerd ke no qerar bi hemkarîya PDKyî û Tirkîya ameyo girewtene.

Hemwelatîyan ra K.F.yo ke herêma Bewarî de ciwîyeno û nêwaşt nameyê xo bido vat:  ''Hêrsê şarî yê vera PDKyî rojanê peyênan de zêdîyayo. PDKyî têna vera gerîlayan nê vera şarî zî polîtîkaya xirabe vist dewre. Coka ma nê caardişanê înan şermezar kenê. Ma welatê xo de neêşkenê şirê herra xo. No heqê ma yo esasîyo ke PDK cehd keno  destê ma ra bigero. PDK hem nêverdeno ma şirê herra xo hem zî vano 'PKK desturê şarî nêdano. 'Na neheqîyeya pîle ya. Eke wina dewam bikerê do nêazîbîyayîşê şarî zafêr bo û protestoyê kîtlekî bêrê kerdene.''