Endama Koordînasyonê KJKyî Besê Erzîncan bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan ANFyî rê qisey kerd.

Qiseykerdişê Erzîncane ra beşêk wina yo:

''Seba ke Rayber Apoyî sîstemê cuyêka alternatîfe awan kerd yeno tecrîdkerdene. Mabênê qedînayîşê qirkerdişê cinîyan û azadîya Rayberê ma de têkilîyêka xurte esta. Hemleya ke ma seba azadîya Rayber Apoyî anê ca heman wextî de seba azadîya cinîyan a zî. Coka têkoşînê cinîyan ê  seba azadîya ey do têkoşînê azadîya cinîyan aver bibo.

Ganî her roje sey 25ê Teşrîna Peyêne bêra ercnayene û cinîyî vejîyê kuçe û meydanan. Nê wextî de yewî û îtîfaqê cinîyan mecbûrî yê. Nakokîya cînsî, têkoşînê têna sey meseleyêka cinîyan dîyena la na meseleya komelî ya. Seba ke ma seserra 21. bikerê seserra azadîya cinîyan ganî ma pê qerardarî û hêvîyêka pîler  bixebitê. Girîng o ke ma hînî têkoşînêkê yewbîyayeyî û radîkalî bikerê.

Dewleta tirke rixmê hende xîretanê xo zî nêeşkîyaye verê cinîyan ê kurdan bigêra. Cinîyê kurdî bi ruhê azadî, bi xoverdayîş, qerardarî û îdîayêka xurte 25ê Teşrîna Peyêne pêşwazî kenê. Têgêrayîşê ma yê cinîyan ê Rojawanî zî rixmê hêrişan çalakîyanê xo dewam keno. Hetê bînî ra Rojawan de bingeyê hemkarîya cinîyan ê ereb, sûryan, armen, çerkes, sûrî û kurdan ser karê şorişgêrî yenê ca. 

Rojhelatê Kurdîstanî de zî cinîyanê ma bi xurtî vera rejîmî xo ver da. Ganî Îran heq û azadîya cinîyan, ê şarê kurdî û kurdanê yarsanan bişinasno. Cinîyê Başûrê Kurdîstanî zî neçare yê ke rêxistinîya xo aver berê. Başûrê Kurdîstanî ê herêman ra yo ke tede şîdetê vera cinîyan tewr zêdêr o.

Tewr zaf ganî cinîyê kurdî seba yewîya neteweyîye bixebitê û bi taybetî cinîyê Başûrî serkêşîya naye bikerê.

Cinîyanê Şingalî fermanî ra dima hîşmendîya xo ya azadîye, rêxistinîya xo ya xoser bi hawayêkê serkewteyî ardî ca. Cinîyanê Şingalî seba xoserîya Şingalî bi xurtî xebitîyenê. Nê esasî ser o ma karanê peyênan ê cinîyan ê êzidîyan rê selam kenê. Ganî cinîyê êzidîyî yewîya xo bîyarê ca, zêdêr tewrê karanê yewîya neteweyîye û yewîya cinîyan a Rojhelatê Mîyanênî bibê.

Kampanyaya '100 Sebebê seba hukmkerdişê dîktatorî' seba cinîyan ê kurdan ê Ewropa zaf girîng a. Ganî cinîyê Ewropa pêro tewrê na kampanya bibê.

Gerîlayê cinîyî zî binge û îdarekarê xoverdayîşê ma yê azadîye yê. Gerîlayî nika sere de Heftanîn de çar parçeyanê Kurdîstanî de bi hawayêkê fedayîyî şerê xopawitişî kenê.

Ma nê esasî ser o bi rêxistinîya xopawitişî û xoverdayîşêkê pîlî 25ê Teşrîna Peyêne pêşwazî kenê. Ma do bi nê hawayî  hem destkewteyanê cinîyan bipawê hem zî rayberîya awankerdişê cuya azade bikerê.''