Serekwekîla Koma HDPyî Merale Daniş Beştaş vera esîrkerdişê Hemserekê Pêroyî yê DBPyî Keskîn Bayindirî û Hemserekê DBPyî yê Amedî Hayrettîn Altunî verê Edlîyeya Amedî de eşkerayîyêke daye çapemenîye.

Beştaşe vat: ''4 rojî nezaret de tepişîyayî. Xeylêk şaristanan de vera DBPyî operasyonê hemwextî ameyî kerdene. Eleqeyê îqtîdarê AKP-MHPyî yê bi nê oeprasyonî est o. Ê DBPyî ra aciz bîyî. Bê sûc û delîlê sûcî polîsan eşt bînayanê DBPyî ser. Serdozgerîya Mehkemeya Berze bi kontrolkerdiş û cigêrayîşê partîyanê sîyasîyan mesuldar a. Înan dest nayo erkê Mehkemeya Berze ser. Mehkemeya Berze ya ke binê emrê îqtîdarî de ya, ney rê vengê xo nêkena. Îqtîdarî bi erkê mehkemeya berze eşto serê bînayanê partîye.

Ma venga muxalîfan, kesanê demokratan, terefgîranê heqanê merdiman, huqûq û edaletî danê ke DBPyî rayê bi mîlyonan kesan girewtê û partîyêka pîl a kurdan a. Nê operasyonî mojnenê ke Tirkîya de heta ke meseleya kurdan çareser nêba qet yew mesele çareser nêbena. Ma hetê DBPyî de yê; ma heta nika pîya têkoşîn kerd û do reyna pîya têkoşîn bikerê. Ma do qetî rayîrê xo ra anêgêrê. Ma do hîna bibê pîl. Embaz Keskîn her kesî selam keno.''