Şêwirmendê Îrtîbatî Elî Elfacîyî hêrişê dewleta tirke ya îşxalkere yê vera Iraqî û bêvengîya hukmatê Iraqî ANFyî rê ercnayî. 

Şêwirmendê Îrtîbatî Elî Elfacîyî da zanayene ke ganî hukmatê Iraqî pê rayîrê dîyalogan şaranê xo mîyan de têkilîye virazo. Elfacîyî vist vîrî ke mehkemeya federale ya Iraqî bire dabî ke heqê kotaya êzidî, şebek û kurdan dûştê qanûnê bingeyî yo û vat: ''No sînorkerdişê kota şaranê Iraqî parçe keno. selahîyetdarê Iraqî zî goreyê netewe, bawerî û mezhebê xo têgêrenê. Ganî Iraq bibo yew welat û tede cîyakerîye nêba. Kurdê êzidî û feylîyî yenê wetêrkerdene. Ganî ma bi rayîrê dîyalogan heqê na cîyatîye ra bêrê, vengê xo bidê eşnawitene.''

Elfalcîyî bale ante ser ke dewleta tirke her roje erdê Iraqî dana bombayan ver û vat: ''Bêvengîya hukmatê Iraqî ya vera bombardumananê dewleta tirke şerm o. Naa bêvengîya nîşaneya qelsîya dewleta Iraqî ya. Eke biwazo Hukmatê Iraqî eşkeno vera Tirkîya têbigêro la wina nêkeno. No zî mojneno ke beno ke dewleta tirke û tay selahîyetdaranê Iraqî pêkerdo.''