Hemserekîya Konseya Rayberdişî ya KCK’yî derheqê weçînitişanê Stenbolî de eşkerayîyêk daye.

KCK’yî vat, “Hemleya ‘Ma tecrîdî bişiknê, faşîzmî birijnê û Kurdistanî azad bikerê’ ke Têgêrayîşê Azadîya Kurdan û hêzanê demokrasîyî bi heme leteyanê xo menga Teşrîna Peyên a 2018’î de dabî destpêkerdene, hem berê Îmraliyî akerd, hem zî derbêka girane da faşîzmê AKP-MHP’yî ro. Binkewtişê nê tîfaqê faşîstî yê Stenbolî netîceyê hemleya ‘Ma peynîya faşîzmî bîyarê, Tirkîya bikerê demokratîke’ de bi. Loma aya ke bi ser kewte û bi ser fînaye, xeta Rayber Apoyî ya demokratîkkerdişê Tirkîya ya ke bingeyê tîfaqê demokratîkî ser o ronîyaya.”

 Mabênê Ma û Rayber Apoyî de Girêdayîşêk Esto ke Hêzê Şerê Taybetî Fam Nêkenê

KCK’yî vat oyo ke tewirê HDP’yî aferna ke 23’ê Hezîrane de rayîrê serkewtişê hêzanê demokrasîyî akerd û bi sebebê viraştişê tîfaqê demokratîkî, oyo ke bi sebeb ke şaro Kurd bi hişmendîyêka xurte ya demokrasîyî tê bigêro Rayberê Şarê Kurdî bi. Eşkerayîye de ame vatene, “Ercnayîşê ke hişmendîya demokratîke ya şarê Kurdî û cigêrayîşê seba tîfaqê demokratîkî xeta îdeolojîk û polîtîke ya Rayberê Şarê Kurdî ra cîya vînenê, yan rastîye nêvînayîşî ra yenê, yan zî wazenê bi zanabîyayîşî rastîye serûbin bikerê. Sey vizêrî ewro zî muxatebê çareserîya demokratîke ya problemê Kurdan yo esas Rayber Apo yo.

Ganî her kes bi na rastîye bizano; qismo pîl ê şerî yo ke dewleta Tirkî ya kolonyalîste ya qirkerdoxe hemverê mucadeleyê ma yê azadîye de rayra bena, şero taybet o psîkolojîk o. Ganî bêro zanayene ke mabênê Rayber Apoyî û têgêrayîşê ma de, mabênê Rayber Apoyî û şarê ma de girêdayîşêko tarîxî, cimatkî, fikirkî û hîsdarî esto ke hêzê şerê taybetî nêeşkenê fam bikerê. Ê kenê ke bi şarî bidê bawerkerdene ke mabênê Rayber Apoyî û têgêrayîşê ma de û sîyasetê demokratîkî de tewir û nizdbîyayîşê cîyayî estê. No enstrumanêkê şerê psîkolojîkî yê hemverê têgêrayîşê ma yo.

Wext Wextê Hemleya Demokratîkkerdişê Tirkîya yo

Hêzanê demokrasîyî û şarê Kurdî bi tewirê xo yê 23’ê Hezîrane seba demokratîkbîyayîşê Tirkîya îmkanê pîlî û zemînêkê xurtî afernayê. Halêkê winayênî de partîyê olîgarşîkî yê ke heta nika bîyê îqtîdar yan do serê bingeyê pêameyîşî de bibê hetêkê prosesê demokratîkbîyayîşî, yan zî do bi hemleya demokratîkbîyayîşî raste ra wedarîyê.

Weçînitişê 23’ê Hezîrane seke HDP’yî zî vatibi agêra referandûmêkê demokrasîyî. No referandûm heman wextî de razîbîyayîşê şarê ma yo ke wazeno bingeyê demokratîkbîyayîşê Tirkîya de problemê Kurdan bêro çareserkerdene. Şarê ma yê ke weçînitişê Stenbolî de hemverê fehmê faşîstî tewirêko polîtîk ramot, ganî bi tîfaqê xo yê demokratîkî û mucadeleyê xo, yan nê zihnîyetê îqtîdarî ver bi demokratîkbîyayîşî biancê yan zî raste ra wedarê.

Tîfaqo demokratîk o ke Rayber Apo sey rayîro hîrêyin name keno û afernayîşê ci de rolêkê êyo bewlîkerdox esto, nê weçînitişî de hem xurt bi û hem zî mesuldarîya ci ya tarîxîye bîye zêde. Bi hişmendîya ke Rayber Apoyî afernaya û xeta êya sîyasîye, şarê Kurdî û hêzanê demokrasîyî seba ameyoxê Tirkîya yê demokratîkî hêzêko pîl ê demokratîkî peyda kerd û seba şaran zî umîdêko pîl aferna.

Mucadeleyê Azadî û Demokrasîyî do Serê Xeta Rayber Apoyî de Bibo Pîl

Tîfaqê şarê Kurdî yê bi hêzanê demokrasîyî yo ke xo HDP’yî de ramot zaf muhîm o. Serkewtişê 23’ê Hezîrane tena serkewtişê şarê Kurdî nêyo. Serkewtişê heme hetan o ke binê sîwanê HDP’yî de ameyê têhet û alternatîfêko şorişgêr seba Tirkîya afernayo. Na çarçewa de ma veng danê şarê Kurdî û hêzanê demokrasîyî ke nê tîfaqê demokratîkî ke serkewtişêko pîl bi dest fîna û da qezenckerdene hîna bikerê xurt.  

Ganî her kes na rastîye bizano; Têgêrayîşê ma yê azadîye, şaro Kurd û têgêrayîşo sîyasî yo demokratîko ke bi xeta Rayberîye virazîya, sey verî do tîya ra tepîya zî xeta Rayber Apoyî de mucadeleyê demokrasî û azadîye bikerê pîl, bingeyê demokratîkbîyayîşê Tirkîya û azadîya şarê Kurdî de, mucadeleyê demokratîkkerdişê temamê Rojakewtena Mîyanêne bi her hawayê fedakarîye bidomnê.”